பயங்கர வெள்ளத்தில் சிக்கிய சொகுசு கார்கள், புல்டோசர்கள்… காஷ்மீரில் விடிய விடிய நடந்த கோரத்தாண்டவம்… நடுங்க வைக்கும் வீடியோ…!

ஜம்மு-காஷ்மீரின் டோடா மற்றும் கிஷ்த்வார் மாவட்டங்களில் பெய்த கனமழை காரணமாக திடீர் வெள்ளப்பெருக்கு ஏற்பட்டு பெரும் சேதம் விளைவித்துள்ளது. இதனால் டோடா-கிஷ்த்வார் நெடுஞ்சாலையில் (தேசிய நெடுஞ்சாலை 244) பிரேம்நகர் பகுதியில் போக்குவரத்து முற்றிலும் துண்டிக்கப்பட்டுள்ளதுடன், பல வாகனங்கள் மண்ணிலும் இடிபாடுகளிலும் சிக்கியுள்ளன. அதிர்ஷ்டவசமாக இந்த இயற்கை சீற்றத்தில் எவ்வித உயிர்ச்சேதமும் அல்லது காயங்களும் ஏற்படவில்லை என்றாலும், சாலைகளை சீரமைக்கும் பணிகள் தற்போது தீவிரமாக நடைபெற்று வருகின்றன. பாதுகாப்பு கருதி இந்த வழியைப் பயன்படுத்துவதைத் தவிர்க்குமாறு அதிகாரிகள் பொதுமக்களை அறிவுறுத்தியுள்ளனர்.

குறிப்பாக, பிரேம்நகர் மற்றும் கட்டுமானப் பணியில் உள்ள 540 மெகாவாட் குவார் நீர்மின் திட்டப் பகுதிக்கு அருகே நிலைமை மிகவும் மோசமாக உள்ளது. திடீர் வெள்ளத்தால் அடித்து வரப்பட்ட டன் கணக்கான களிமண், பாறைகள் மற்றும் இடிபாடுகள் குவார் திட்டப் பகுதியில் நிறுத்தி வைக்கப்பட்டிருந்த லாரிகள், புல்டோசர்கள் உள்ளிட்ட கட்டுமான எந்திரங்கள் மற்றும் பொதுமக்களின் வாகனங்களை முழுமையாக மூடியுள்ளன. காலையில் நிலைமை மிகவும் பயங்கரமாக இருந்ததாகவும், சம்பவ இடத்திற்கு உடனடியாக மீட்புக் குழுவினரும், ஜேசிபி எந்திரங்களும் வரவழைக்கப்பட்டு இடிபாடுகளை அகற்றும் பணிகள் போர்க்கால அடிப்படையில் முடுக்கிவிடப்பட்டுள்ளதாகவும் நெடுஞ்சாலை மேலாளர் சன்னி பாதா தெரிவித்துள்ளார்.

ஜம்மு பிராந்தியத்தில் கடந்த 24 மணி நேரத்தில் அதிகபட்சமாக சாம்பா பகுதியில் 90 மி.மீ மழையும், கதுவாவில் 66.2 மி.மீ மழையும் பதிவாகியுள்ளது. டோடாவில் 42 மி.மீ மற்றும் கிஷ்த்வாரில் 24 மி.மீ மழையும் பெய்துள்ளதுடன், ரியாசி மாவட்டத்தின் உயரமான பகுதிகளிலும் சிறிய அளவிலான வெள்ளப்பெருக்கு ஏற்பட்டுள்ளது. இந்த நிலையில், கனமழை, இடிமின்னல் மற்றும் நிலச்சரிவு ஏற்பட வாய்ப்புள்ளதாக வானிலை ஆய்வு மையம் ஏற்கனவே எச்சரித்துள்ளதால், ஆறுகள் மற்றும் நீர்நிலைகளின் அருகே வசிக்கும் மக்கள் பாதுகாப்பாகவும் விழிப்புடனும் இருக்குமாறும், ஆபத்தான பகுதிகளுக்குச் செல்வதைத் தவிர்க்குமாறும் உள்ளூர் நிர்வாகம் கேட்டுக்கொண்டுள்ளது.