“டைம் முடிந்தது…!” ஈரானுக்கு எதிரான நிலைப்பாட்டைத் தெளிவுபடுத்திய ட்ரம்ப்… உலக அளவில் பதற்றம்…!!

ஈரான் மீதான தாக்குதலில் அணு ஆயுதங்களைப் பயன்படுத்தப் போவதில்லை என்று அமெரிக்க அதிபர் டொனால்ட் ட்ரம்ப் திட்டவட்டமாகத் தெரிவித்துள்ளார். போர்நிறுத்தம் அமலில் உள்ள நிலையில், ஈரானுடன் ஒரு நிலையான மற்றும் சிறந்த ஒப்பந்தத்தைச் செய்துகொள்ள விரும்புவதாகவும், அதற்காக அவசரப்படப் போவதில்லை என்றும் அவர் கூறியுள்ளார். அணு ஆயுதங்கள் இல்லாத சாதாரண ஏவுகணைகளைக் கொண்டே ஈரானின் கடற்படை மற்றும் விமானப் படைகளை ஏற்கனவே அமெரிக்கா சிதைத்துவிட்டதாகவும், எனவே அணு ஆயுதங்களைப் பயன்படுத்த வேண்டிய அவசியம் தமக்கு இல்லை என்றும் அவர் செய்தியாளர்களிடம் விளக்கம் அளித்துள்ளார்.

அமைதிப் பேச்சுவார்த்தை ஒருபுறம் நடந்தாலும், ஈரானுக்குக் காலம் கடந்து கொண்டிருப்பதாகவும், அவர்கள் ஒப்பந்தத்திற்கு உடன்படவில்லை என்றால் ராணுவ ரீதியாகப் போரை முடிவுக்குக் கொண்டு வரத் தயங்க மாட்டேன் என்றும் ட்ரம்ப் எச்சரித்துள்ளார். ஈரானின் தலைமைக்குள் தற்போது கடும் குழப்பம் நிலவி வருவதாகவும், வரும் நாட்களில் அவர்கள் மீதான அழுத்தம் மேலும் அதிகரிக்கப்படும் என்றும் அவர் குறிப்பிட்டுள்ளார். ஈரானிடம் உள்ள ஆயுதக் கிடங்குகளை ஒரே நாளில் தரைமட்டமாக்கும் வலிமை அமெரிக்காவிடம் இருப்பதாகவும், எவ்வித அணு ஆயுதப் பயன்பாடும் இன்றித் தங்களால் வெற்றியைப் பெற முடியும் என்றும் அவர் நம்பிக்கை தெரிவித்துள்ளார்.