“சென்னையில் வைத்து கர்நாடக முதல்வர் போட்ட குண்டு”…. மேடையில் முதல்வர் விஜய் – மேகதாதுவால் அதிரும் தென்மாநில மாநாடு…..!

மேகதாதுவில் அணை கட்டுவது தொடர்பாகத் தமிழ்நாடு மற்றும் கர்நாடக இடையே நீண்டகாலமாக நதிநீர்ச் சிக்கல் நிலவி வருகிறது. காவிரி மேலாண்மை ஆணையம் மற்றும் உச்ச நீதிமன்றத்தின் உத்தரவுகள் இருந்தபோதிலும், உரிய காவிரி நீரைத் திறந்துவிட கர்நாடக அரசு தாமதம் செய்து வருகிறது. இந்த விவகாரத்தின் பின்னணியில் கர்நாடக மாநிலத் தலைவர்கள் அரசியல் செய்வதாகவும், மேகதாது திட்டத்தை நிறைவேற்றுவதே அவர்களின் முதன்மை நோக்கமாக இருக்கிறது என்றும் தமிழக தரப்பில் பல்வேறு விமர்சனங்கள் முன்வைக்கப்பட்டு வருகின்றன.

இந்நிலையில், தென்னிந்திய மாநிலங்களின் வளர்ச்சி மற்றும் உள்கட்டமைப்பு குறித்த முக்கியப் பேச்சுவார்த்தைக்காகத் தென் மாநில முதல்வர்கள் மாநாடு சென்னையில் நடைபெற்றது. இம்மாநாட்டில் கலந்துகொள்வதற்காகக் கர்நாடக முதல்வர் டி.கே. சிவகுமார் சென்னை வந்திருந்தார். அதேபோலத் தமிழக முதல்வர் விஜயும் இம்மாநாட்டில் பங்கேற்றார். மாநிலங்களுக்கு இடையேயான நெடுஞ்சாலைத் திட்டங்கள், நதிநீர் இணைப்பு மற்றும் பகிர்வு உள்ளிட்ட பல்வேறு இருதரப்பு விவகாரங்கள் குறித்து இக்கூட்டத்தில் விரிவாக விவாதிக்கப்பட்டது.

மாநாட்டில் உரையாற்றிய கர்நாடக முதல்வர் டி.கே. சிவகுமார், மேகதாது திட்டத்தின் அவசியத்தை வலியுறுத்திப் பேசினார். மேகதாதுவில் அணை கட்டி நீரைச் சேமித்து வைப்பதன் மூலம் கர்நாடகா மட்டுமின்றி தமிழ்நாடு மாநிலமும் பலனடையும் என்றும், அணை இல்லாததால் உபரிநீர் வீணாகக் கடலில் கலப்பதாகவும் அவர் குறிப்பிட்டார். நீரைச் சேமிப்பதன் மூலம் வறட்சி போன்ற நெருக்கடியான காலங்களில் இரு மாநிலங்களும் அதனைப் பயன்படுத்திக் கொள்ள முடியும் எனத் தெரிவித்த அவர், கிருஷ்ணா நதிநீர் விவகாரம் தொடர்பாகவும் உச்ச நீதிமன்றத்தில் சட்டப்போராட்டம் தொடர்ந்து நடைபெற்று வருவதாகக் கூறினார்.