இரவில் அதிரடி காட்டிய தமிழக அரசு… எம்-சாண்ட், ஜல்லி கடத்தலுக்கு 3 மாத இடைக்காலத் தடை…. கலெக்டர்களுக்கு பறந்த அதிரடி உத்தரவு..!

தமிழ்நாட்டில் எம்-சாண்ட், பி-சாண்ட், ஜல்லி கற்கள், கருங்கல் மற்றும் குண்டு கற்கள் உள்ளிட்ட கட்டுமானப் பொருட்களின் விலை வரலாறு காணாத வகையில் தொடர்ந்து உயர்ந்து வருகிறது. வங்கிக் கடனை நம்பியும், வாழ்நாள் சேமிப்பை முதலீடு செய்தும் சொந்த வீடு கட்டும் நடுத்தர மக்கள் மற்றும் சிறு தொழிலதிபர்கள், இந்த அபரிமிதமான விலையேற்றத்தால் பெரும் அதிர்ச்சிக்குள்ளாகியுள்ளனர். மாநிலத்தின் உள்நாட்டுத் தேவைக்கேற்ப போதிய கனிம வளங்கள் இல்லாத சூழ்நிலையில், மூலப்பொருட்களின் கடும் தட்டுப்பாடும் உருவாகி கட்டுமானத் துறை முடங்கும் அபாயம் ஏற்பட்டது.

கட்டுமானப் பொருட்களின் விலையைக் கட்டுப்படுத்தவும், உள்நாட்டு விநியோகத்தை சீரமைக்கவும் போர்க்கால அடிப்படையில் நடவடிக்கை எடுக்க வேண்டும் எனப் பொதுமக்கள் மற்றும் கட்டுமானத் துறையினர் கோரிக்கை விடுத்து வந்தனர். இச்சூழலைக் கருத்தில் கொண்டு, தமிழ்நாட்டிலிருந்து அண்டை மாநிலங்களுக்கு சாதாரண கற்கள், ஜல்லி மற்றும் எம்-சாண்ட் உள்ளிட்ட கனிம வளங்களை லாரிகள் மூலம் கொண்டு செல்ல 3 மாதங்களுக்குத் தற்காலிக தடை விதித்து புவியியல் மற்றும் சுரங்கத்துறை இயக்குநர் அதிரடி உத்தரவு பிறப்பித்துள்ளார்.

முன்னதாக, வெளிமாநிலங்களுக்குக் கனிமங்களை ஏற்றுமதி செய்வதைத் தற்காலிகமாகத் தடை செய்ய சுரங்கம் மற்றும் புவியியல் துறை இயக்குநருக்கு அதிகாரம் வழங்கி தமிழக அரசு அரசாணை வெளியிட்டிருந்தது. அதனடிப்படையில் பிறப்பிக்கப்பட்டுள்ள இந்தத் தடை உத்தரவு உடனடியாக அமலுக்கு வந்துள்ளது. இருப்பினும், நிர்வாக ரீதியான தொடர்புகள் மற்றும் அருகாமையைக் கருத்தில் கொண்டு, இத்தடையில் இருந்து புதுச்சேரி மற்றும் காரைக்கால் பகுதிகளுக்கு மட்டும் விலக்கு அளிக்கப்பட்டு விலக்கு அறிவிக்கப்பட்டுள்ளது.

இந்த உத்தரவை தீவிரமாக நடைமுறைப்படுத்த எல்லையோர மாவட்ட ஆட்சியர்களுக்கும், காவல்துறை கண்காணிப்பாளர்களுக்கும் அறிவுறுத்தப்பட்டுள்ளது. கனிம வளங்கள் சட்டவிரோதமாக கடத்தப்படுவதைத் தடுக்க எல்லைச் சாவடிகளில் கண்காணிப்பும் தீவிரப்படுத்தப்பட்டுள்ளது. தமிழக அரசின் இந்த அதிரடி நடவடிக்கையால், உள்ளூர் சந்தையில் மூலப்பொருட்களின் தட்டுப்பாடு குறைந்து, கட்டுமானப் பொருட்களின் விலை விரைவில் சீராகும் என பொதுமக்கள் நம்பிக்கை தெரிவித்துள்ளனர்.