அட கொடுமையே… ஓடும் ஏசி ரயிலில் பற்றவைக்கப்பட்ட தீ… நொடியில் நடக்கவிருந்த பேரழிவு… உறைந்துபோன பயணிகள்…!

ஓடும் ரயிலின் ஏசி பெட்டியில் மேல் படுக்கையில் அமர்ந்திருந்த ஒரு பயணி, அகல் விளக்கு மற்றும் தூபக் குச்சிகளை கொளுத்தி பூஜை செய்த சம்பவம் தொடர்பான வீடியோ சமூக வலைதளங்களில் வெளியாகி வைரலாகி வருகிறது. ஏசி பெட்டி போன்ற மூடிய சூழலில் திறந்த நெருப்பைப் பயன்படுத்துவது ரயில் பாதுகாப்பிற்கு பெரும் அச்சுறுத்தலாக அமைந்ததால், இச்சம்பவம் இணையவாசிகளிடையே கடும் விவாதத்தைக் கிளப்பியுள்ளது.

இந்த வீடியோவில், அப்பயணி பூஜையைத் தொடரும் போது, அருகில் இருந்த சக பயணி ஒருவர் அவரைத் தடுத்து எச்சரிப்பதைப் பார்க்க முடிகிறது. ஏசி பெட்டிகளில் புகை கண்டறியும் தானியங்கி அமைப்புகள் பொருத்தப்பட்டிருப்பதால், தூபக் குச்சிகளின் புகை அலாரத்தை இயக்கி ரயிலின் அவசர பிரேக்குகளைத் தூண்டக்கூடும் என்றும், படுக்கைகள் மற்றும் திரைச்சீலைகள் நிறைந்த ஏசி பெட்டியில் தீப்பற்றினால் பெரும் விபத்து ஏற்படும் என்றும் சக பயணிகள் சுட்டிக்காட்டினர்.

இச்சம்பவம் குறித்து ரயில்வே நிர்வாகம் விசாரணை மேற்கொண்டு வருகிறது. சம்பந்தப்பட்ட ரயில் மற்றும் பயணியைக் கண்டறிய PNR மற்றும் ரயில் விவரங்களை அதிகாரிகள் கோரியுள்ளனர். இந்திய ரயில்வே சட்டத்தின்படி, ரயிலுக்குள் தீப்பெட்டி, எளிதில் தீப்பற்றக்கூடிய பொருட்கள் மற்றும் திறந்த நெருப்பைப் பயன்படுத்துவது தண்டனைக்குரிய குற்றமாகும் என்றும், இத்தகைய விதிமீறல்களுக்கு கடும் அபராதம் மற்றும் சிறைத்தண்டனை விதிக்கப்படலாம் என்றும் அதிகாரிகள் எச்சரித்துள்ளனர்.