“இந்த நாடே என் வீடுதான்… தமிழ்தேசியத்தின் செல்லப்பிள்ளையை நான் தான்”!… கார்த்தி சிதம்பரத்தின் விமர்சனத்திற்கு சீமானின் அதிரடி பதிலடி…!!!

தமிழக சட்டமன்றத் தேர்தல் களம் சூடுபிடித்துள்ள நிலையில், காரைக்குடியில் பரப்புரை செய்த காங்கிரஸ் எம்.பி. கார்த்தி சிதம்பரம், நாம் தமிழர் கட்சியின் தலைமை ஒருங்கிணைப்பாளர் சீமானை கடுமையாக விமர்சித்தார். “சீமானுக்கு இங்கு ஓட்டு கிடையாது, சொந்த வீடும் கிடையாது” என்று அவர் முன்வைத்த விமர்சனம் அரசியல் வட்டாரத்தில் பெரும் விவாதத்தை ஏற்படுத்தியது. இதற்குப் பதில் அளிக்கும் வகையில் செய்தியாளர்களைச் சந்தித்த சீமான், கார்த்தி சிதம்பரத்தின் பேச்சுக்குத் தனது தம்பி, தங்கைகளே பதில் அளிப்பார்கள் என்றும், அவரது தந்தை சிதம்பரம் பேசினால் தான் பதில் பேசுவேன் என்றும் காட்டமாகத் தெரிவித்தார்.

கார்த்தி சிதம்பரத்தின் விமர்சனம் சிறுபிள்ளைத்தனமானது என்று குறிப்பிட்ட சீமான், தேசிய அரசியலை முன்வைத்து அடுக்கடுக்கான கேள்விகளை எழுப்பினார். “ராகுல் காந்தி வயநாட்டில் போட்டியிட்டாரே, அவருக்கு அங்கு வீடோ ஓட்டோ இருந்ததா? அதேபோல் பிரியங்கா காந்திக்கு அவர் போட்டியிட்ட இடத்தில் வீடு இருந்ததா?” என்று கேள்வி எழுப்பிய அவர், மேலூர் தொகுதி காங்கிரஸ் வேட்பாளர் காஞ்சிபுரத்தைச் சேர்ந்தவர் என்பதையும் சுட்டிக்காட்டினார். மேலும், ‘ஒரே நாடு ஒரே தேர்தல்’ என்று பேசுபவர்கள், ஒரு தொகுதியில் வீடு இல்லை என்று விமர்சிப்பது முரண்பாடானது என்றும் அவர் சாடினார்.

தன்னைப் ‘புலி’ என்று வர்ணித்துக்கொண்ட சீமான், காரைக்குடியில் தமக்கு வீடு இல்லையென்றாலும் இந்த நாடே தனது வீடு என்றும், ஒட்டுமொத்தத் தமிழ்தேசியத்தின் செல்லப்பிள்ளை தான் என்றும் பெருமிதத்துடன் கூறினார். “நானும் கார்த்தி சிதம்பரமும் வெளிநாடு சென்றால் அங்கு யாருக்கு அதிக வரவேற்பு இருக்கிறது என்று தெரியும்; அப்போது விளங்கும் யார் செல்லப்பிள்ளை, யார் செல்வப்பிள்ளை என்று” என அவர் சவால் விடுத்தார். கார்த்தி சிதம்பரம் காரைக்குடிக்கு வந்து தனது கேள்விகளுக்குப் பதில் அளிக்கட்டும் என்றும் அவர் கேட்டுக்கொண்டார்.

இறுதியாகத் தனது அரசியல் நிலைப்பாடு குறித்துப் பேசிய சீமான், தேர்தலில் தாம் வெல்வதும் வீழ்வதும் இரண்டாம் பட்சம் என்றும், ஆனால் தனித்து நின்று தன்மானத்தோடு போட்டியிடும் துணிவு தமக்கு மட்டுமே இருப்பதாகவும் தெரிவித்தார். ஆளுங்கட்சியே 22 கட்சிகளுடன் கூட்டணி வைத்துப் போட்டியிடும் சூழலில், நாம் தமிழர் கட்சி மக்கள் மீது நம்பிக்கை வைத்துத் தனித்துப் போட்டியிடுவதைச் சுட்டிக்காட்டிய அவர், காங்கிரஸும் அந்தக் கூட்டணியில் ஒரு அங்கமாக இருப்பதை விமர்சித்துப் பேசினார்.