“200 டன் எமன்” துடிதுடித்த காவலர்.. 15 நிமிட பயணத்திற்கு 6 மணிநேர நரகம்.. மும்பை நெடுஞ்சாலையை உலுக்கிய ‘கிரேன்’ விபத்து..!!

மும்பை மாங்குர்த் பகுதியில் உள்ள சியோன்-பான்வெல் நெடுஞ்சாலையில் நிகழ்ந்த கிரேன் விபத்து, கடந்த சில நாட்களாக அந்தப் பகுதியில் மிகப்பெரிய போக்குவரத்து நெரிசலை ஏற்படுத்தியுள்ளது. மேம்பாலப் பணிகளுக்காகப் பயன்படுத்தப்பட்ட சுமார் 200 டன் எடையுள்ள பிரம்மாண்ட கிரேன், நிலைதடுமாறி சாலையில் விழுந்ததே இந்த பாதிப்பிற்கு முக்கியக் காரணமாகும். வழக்கமாக 15 நிமிடங்கள் மட்டுமே ஆகக்கூடிய பயண தூரத்தைக் கடக்க, வாகன ஓட்டிகள் 6 மணி நேரம் வரை காத்திருக்க வேண்டிய கட்டாயத்திற்குத் தள்ளப்பட்டனர்.

இந்தத் துயரச் சம்பவத்தில் சந்தோஷ் சவான் என்ற காவலர், தனது இருசக்கர வாகனத்தில் வீடு திரும்பிக் கொண்டிருந்தபோது கிரேன் அவர் மீது விழுந்ததில் பரிதாபமாக உயிரிழந்தார். இந்த விபத்தைத் தொடர்ந்து கிரேன் அகற்றப்படும் வரை போக்குவரத்து முற்றிலும் முடங்கியது. பிரபல பாலிவுட் நடிகை சோனாலி குல்கர்னி உட்பட ஆயிரக்கணக்கான பயணிகள், குடிநீர் மற்றும் அடிப்படை வசதிகள் இன்றி சாலைகளிலேயே பல மணிநேரம் சிக்கித் தவித்தனர். நடிகை சோனாலி தனது சமூக வலைதளப் பக்கத்தில், இந்த அனுபவம் மிகவும் “பயமுறுத்துவதாக” இருந்ததாக வீடியோ வெளியிட்டு வருத்தம் தெரிவித்துள்ளார்.

தற்போது அந்தப் பெரிய கிரேன் அகற்றப்பட்டாலும், மீட்புப் பணிகளுக்காகக் கொண்டுவரப்பட்ட பிற இயந்திரங்கள் இன்னும் சாலையில் இருப்பதால் போக்குவரத்து சீரடைய மெதுவாகவே வாய்ப்புள்ளது. இந்த விபத்து தொடர்பாக ஒப்பந்ததாரர் மீது கவனக்குறைவாகச் செயல்பட்டதாகக் கூறி காவல்துறையினர் வழக்குப் பதிவு செய்துள்ளனர். மும்பை மாநகராட்சி (BMC) இது குறித்து தீவிர விசாரணை நடத்தி வருகிறது. தேர்தல் காய்ச்சல் ஒருபுறம் இருந்தாலும், மும்பையின் இந்த ‘மெகா’ போக்குவரத்து நெரிசல் தான் தற்போது அம்மாநிலத்தின் ஹாட் டாபிக் ஆக உள்ளது.