தமிழக தேர்தல்… 3 மத்திய அமைச்சர்களை களமிறக்கும் பாஜக… அனல் பறக்கும் அரசியல் களம்…!

தமிழகத்தில் 2026 சட்டமன்ற தேர்தல் நெருங்கிக் கொண்டிருக்கும் சூழலில் பாஜக அதிமுகவுடன் கூட்டணி அமைத்துள்ளது. பீகார் தேர்தலில் மாபெரும் வெற்றி பெற்ற பாஜக அடுத்ததாக தமிழகத்தை டார்கெட் செய்துள்ளது. என்னதான் அதிமுகவுடன் கூட்டணி வைத்திருந்தாலும் சில முக்கிய முடிவுகளை பாஜக தான் தற்போதும் எடுத்து வருகின்றது. அதே சமயம் விஜயை தங்கள் கூட்டணியில் இணைக்கும் முயற்சியிலும் பாஜக தீவிரம் காட்டி வருகிறது. இப்படியான நிலையில் தமிழ்நாடு பாஜக மாநில தலைவர் நயினார் நாகேந்திர நேற்று டெல்லி சென்று இருந்த நிலையில் மத்திய உள்துறை அமைச்சர் அமித்ஷாவை நேரில் சந்தித்து பேசினார்.

இதனைத் தொடர்ந்து பாஜக தமிழக தேர்தலில் வெற்றி பெற பல வியூகங்களை வகுத்து வருகின்றது. இப்படியான நிலையில் 2026 சட்டப்பேரவை தேர்தலை முன்னிட்டு மத்திய அமைச்சர் பியூஸ் கோயலை பொறுப்பாளராக நியமித்து பாஜக தேசிய தலைவர் ஜே பி நட்டா அறிவித்துள்ளார். அதேபோல தேர்தல் இணை பொறுப்பாளர்களாக அர்ஜூன் ராம் மேக் வால், முரளிதர் மோஹோல் ஆகியோரும் நியமிக்கப்பட்டுள்ளனர். 2026 தேர்தலில் NDA கூட்டணி அதிக இடங்களை கைப்பற்றி ஆட்சி அமைக்கும் திட்டத்தோடு 3 மத்திய அமைச்சர்களை பாஜக களமிறக்கியுள்ளது.