“இதெல்லாம் சாத்தியமா?” – கொச்சியில் இருந்து ஜெய்சால்மருக்கு ஆட்டோவில் சென்ற வெளிநாட்டவர்கள்.. மிரளவைக்கும் பயணம்..!!

ஆஸ்திரேலியாவின் பெர்த் நகரைச் சேர்ந்த இரண்டு சுற்றுலாப் பயணிகள், இந்தியாவின் கேரளா மாநிலம் கொச்சியிலிருந்து ராஜஸ்தானின் ஜெய்சல்மேர் வரை சுமார் 2,700 கிலோமீட்டர் தூரத்தை ஒரு ஆட்டோ ரிக்ஷாவில் கடந்து சாதனை படைத்துள்ளனர். விமானம் அல்லது ஏசி வாடகை கார்களைத் தவிர்த்து, இந்தியாவின் சாமானிய வாகனமான ஆட்டோவில் பயணிக்கும் இவர்களது இந்த வினோதமான முயற்சி சமூக வலைதளங்களில் பெரும் வைரலாகி வருகிறது.

நாக்பூர் நெடுஞ்சாலையில் பயணித்துக் கொண்டிருந்த போது, முன்னவர் கான் என்ற நபர் இந்த சுற்றுலாப் பயணிகளைச் சந்தித்து வீடியோ எடுத்துள்ளார். வண்ணமயமாக அலங்கரிக்கப்பட்ட அந்த ஆட்டோவில் தங்களது பயணப் பொதிகளுடன் மிக உற்சாகமாகப் பயணித்த அந்த ஆஸ்திரேலியர்கள், இந்தியாவின் கலாச்சாரத்தையும் மக்களையும் மிக நெருக்கமாக அனுபவிக்கவே இந்த ஆட்டோ பயணத்தைத் தேர்ந்தெடுத்ததாகக் கூறியுள்ளனர்.

இந்த வீடியோவை சமூக வலைதளங்களில் பார்த்த பலரும், “உண்மையான பயண அனுபவம் என்பது இதுதான்” என்றும், “குறைந்த பட்ஜெட்டில் இந்தியாவைச் சுற்றிப் பார்க்க இதைவிடச் சிறந்த வழி இருக்க முடியாது” என்றும் பாராட்டி வருகின்றனர். ஆடம்பர வசதிகளைத் தேடாமல், உள்ளூர் வாழ்க்கையோடு இணைந்து இந்தப் பயணிகள் மேற்கொள்ளும் இந்த சாகசப் பயணம் பலரது கவனத்தையும் ஈர்த்துள்ளது.