“பெங்களூரு பங்களாவில் பயங்கரம்!… நாய்களைப் பராமரிக்க வந்த பெண்ணுக்கு நேர்ந்த கொடூரம்… தொழிலதிபர் செய்த வெறிச்செயல்… நடுங்க வைக்கும் பின்னணி”…!!!

கர்நாடக மாநிலம் பெங்களூரு புறநகர் மாவட்டம் ஒசக்கோட்டை தாலுகாவைச் சேர்ந்த தொழிலதிபர் தீபக் கிருஷ்ணா, தனது பங்களாவில் வேலை செய்து வந்த கேரள மாநிலத்தைச் சேர்ந்த ஸ்மிதா (47) என்ற பெண்ணை பாலியல் வன்கொடுமை செய்ய முயன்று, பின்னர் தாக்கி கொலை செய்த சம்பவம் பெரும் அதிர்ச்சியை ஏற்படுத்தியுள்ளது. நாய்களைப் பராமரிக்கும் வேலைக்காகச் சேர்ந்த ஸ்மிதாவை, ஆள் நடமாட்டம் இல்லாத நேரத்தில் தீபக் கிருஷ்ணா தனது ஆசைக்கு இணங்குமாறு வற்புறுத்தியுள்ளார். அதற்கு அவர் சம்மதிக்காததால் ஆத்திரமடைந்த தொழிலதிபர், உருட்டுக்கட்டையால் ஸ்மிதாவைச் சரமாரியாகத் தாக்கியுள்ளார்.

இந்தக் கொடூரத் தாக்குதலைத் தடுக்க முயன்ற சக ஊழியர்களான அலினா மற்றும் சின்னு ஆகியோரையும், தீபக் கிருஷ்ணா கத்தியைக் காட்டி மிரட்டியுள்ளார். நடந்த விஷயத்தை வெளியே சொன்னால் கொலை செய்துவிடுவேன் என மிரட்டல் விடுத்ததால் அங்கு பெரும் பதற்றம் நிலவியது. தலையில் பலத்த காயமடைந்து ரத்த வெள்ளத்தில் சரிந்த ஸ்மிதாவை மீட்ட சக ஊழியர்கள், அவரை முதலில் சூலிபெலே மருத்துவமனையிலும், பின்னர் மேல் சிகிச்சைக்காகக் கேரள மாநிலம் திருச்சூரில் உள்ள ஜூபிலி மிஷன் மருத்துவமனையிலும் அனுமதித்தனர்.

மருத்துவமனையில் தீவிர சிகிச்சை அளிக்கப்பட்ட போதிலும், சிகிச்சை பலனின்றி ஸ்மிதா பரிதாபமாக உயிரிழந்தார். இதனைத் தொடர்ந்து, அவரது கணவர் ஆண்டனி அளித்த புகாரின் பேரில் கேரள போலீசார் வழக்குப்பதிவு செய்தனர். பின்னர் இந்த வழக்கு விசாரணைக்காகச் சூலிபெலே போலீஸ் நிலையத்திற்கு மாற்றப்பட்டது. தலைமறைவாக இருந்த தொழிலதிபர் தீபக் கிருஷ்ணாவைத் தனிப்படை அமைத்துத் தேடிய போலீசார், இறுதியில் அவரைக் கைது செய்து சிறையில் அடைத்தனர்.

போலீசாரின் முதற்கட்ட விசாரணையில், கைது செய்யப்பட்ட தீபக் கிருஷ்ணா ஏற்கனவே குற்றப்பின்னணி கொண்டவர் என்பது தெரியவந்தது. சில தினங்களுக்கு முன்புதான் ஒரு மதுபான விடுதியில் தகராறில் ஈடுபட்டு, துப்பாக்கியால் வானத்தை நோக்கிச் சுட்ட வழக்கில் அவர் சிறைக்குச் சென்று வந்துள்ளார். தற்போது பெண் தொழிலாளியைக் கொலை செய்த வழக்கில் அவர் மீண்டும் சிறையில் அடைக்கப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது.