அந்தப் பொறுப்பை என்கிட்ட கொடுங்க… விஜயிடம் ரகசிய டீல் பேசிய விஜயபாஸ்கர்… பின்னணியில் இருக்கும் 118 மேஜிக் கணக்கு… அடுத்த ட்விஸ்ட்…!

தமிழக அரசியலில் பெரும் பரபரப்பை ஏற்படுத்தியுள்ள நிகழ்வாக, முன்னாள் அமைச்சர் சி.விஜயபாஸ்கர் தவெகவில் இணைந்திருப்பது பார்க்கப்படுகிறது. அவர் மீதான பல்வேறு ஊழல் புகார்கள் மற்றும் சிபிஐ வழக்குகள் நிலுவையில் உள்ள சூழலில், ‘மக்கள் பணத்தை தொடுபவர்களை விடமாட்டேன்’ என முழங்கிய விஜய், எப்படி இவரை இணைத்துக்கொண்டார் என்ற கேள்வி அரசியல் களத்தில் பேசுபொருளாகியுள்ளது. இதனை திமுக உள்ளிட்ட எதிர்கட்சிகள் ‘வாஷிங் மெஷின்’ அரசியலாக விமர்சித்து வருகின்றன.

இருப்பினும், இந்த இணைப்புக்கு பின்னால் ஒரு வலுவான அரசியல் கணக்கு இருப்பதாகக் கூறப்படுகிறது. தன்னை கட்சியில் இணைத்துக்கொண்டால், மேலும் 5 எம்.எல்.ஏக்களை ராஜினாமா செய்ய வைத்து, அவர்களை தவெகவில் கொண்டு வருவேன் என்ற உறுதியை விஜயபாஸ்கர் விஜய்யிடம் அளித்திருப்பதாகத் தெரிகிறது. கட்சியின் வளர்ச்சிக்கு இத்தகைய அதிரடி நடவடிக்கைகள் தேவை என கருதிய முக்கிய நிர்வாகிகள், விஜய்யை இதற்கு சம்மதிக்க வைத்ததாகத் தெரிகிறது.

இந்த திட்டம் நிறைவேறும் பட்சத்தில், தற்போதுள்ள காலி இடங்களுடன் சேர்த்து மொத்தம் 12 தொகுதிகள் காலியாகும் சூழல் உருவாகும். அந்த 12 தொகுதிகளிலும் தவெக வெற்றி பெற்றால், கட்சியின் எம்.எல்.ஏக்கள் எண்ணிக்கை 118 ஆக உயர்ந்து, தனிப்பெரும்பான்மையுடன் ஆட்சி அமைக்கும் வாய்ப்பு கிட்டும் என்பது விஜயபாஸ்கர் முன்வைத்துள்ள கணக்காகும். ஆட்சியைப் பிடிக்க விரைவான வழி இதுவே என தவெக தலைமை கருதுகிறது.

எந்தவொரு சித்தாந்தத்தையும் விட, ஆட்சியைப் பிடிப்பதே இலக்கு என்ற ரீதியில் இந்த நகர்வுகள் அமைந்திருப்பது, தமிழக அரசியலில் புதிய அதிர்வுகளை ஏற்படுத்தியுள்ளது. விஜயபாஸ்கரின் இந்த ‘ஆப்ரேஷன்’ வெற்றி பெறுமா அல்லது இந்த சர்ச்சைகள் தவெகவின் இமேஜை பாதிக்குமா என்பதை பொறுத்திருந்துதான் பார்க்க வேண்டும். அரசியலில் கொள்கைக்கும், நடைமுறை யதார்த்தத்திற்கும் இடையிலான மோதல் மீண்டும் ஒருமுறை வெளிச்சத்திற்கு வந்துள்ளது.