அதிமுகவை அழிக்கப் பார்க்கிறாரா விஜய்..? பழனிசாமி தரப்பு ஏஜென்டாக செங்கோட்டையன்..! டி.டி.வி.தினகரன் அதிரடி குற்றச்சாட்டு…!!

தமிழக சட்டமன்றத் தேர்தலில் எந்தக் கட்சிக்கும் பெரும்பான்மை கிடைக்காத நிலையில், கூட்டணிக் கட்சிகளின் ஆதரவோடு தமிழக வெற்றிக் கழகம் (தவெக) ஆட்சியமைத்துள்ளது. இந்தத் தேர்தலில் அதிமுக 3-வது இடத்திற்குத் தள்ளப்பட்டதால் கட்சியில் பிளவு ஏற்பட்டுள்ளது. சட்டமன்றத்தில் நடந்த நம்பிக்கை வாக்கெடுப்பின் போது, அதிமுகவின் வேலுமணி ஆதரவு எம்எல்ஏக்கள் 25 பேரும், அமமுக எம்எல்ஏ ஒருவரும் தவெகவுக்கு ஆதரவாக வாக்களித்துள்ளனர்.

திருச்சியில் செய்தியாளர்களைச் சந்தித்த அமமுக பொதுச் செயலாளர் டிடிவி தினகரன், தவெகவை கடுமையாக விமர்சித்தார். கடந்த 2006-ல் திமுகவுக்கு பெரும்பான்மை கிடைக்காத போது காங்கிரஸ் உடனான புரிதலால் ஆட்சி நடந்தது என்றும், ஆனால் தற்போது தவெகவை எதிர்த்துப் போட்டியிட்டு வென்ற காங்கிரஸும், திமுக கூட்டணியில் இருக்கும் விசிக மற்றும் கம்யூனிஸ்ட் கட்சிகளும் தவெக ஆட்சியை வெளியில் இருந்து ஆதரிப்பது ஏன் என்று புரியவில்லை என்றும் சாடினார். மேலும், இன்ஸ்டாகிராம் ரீல்ஸ் மூலமாகவே ஆட்சியை நடத்திவிடலாம் என தவெக நினைப்பதாகக் குற்றம் சாட்டினார்.

அதிமுக என்ற பேரியக்கத்தையும் அதன் தொண்டர்களையும் அழிக்க தவெக முயற்சிப்பதாகவும், அதற்கு ஏஜென்டாக செங்கோட்டையன் செயல்படுவதாகவும் தினகரன் சாடினார். அரசியல் கட்சித் தலைமைக்கே கொறடாவை நியமிக்கும் அதிகாரம் உள்ளது என நீதிமன்றத் தீர்ப்புகள் சுட்டிக்காட்டுவதை நினைவு கூர்ந்த அவர், அமமுக மற்றும் அதிமுக எம்எல்ஏக்களுக்கு அமைச்சர் பதவி கொடுத்தால் சிபிஐ விசாரணை கோருவது உள்ளிட்ட கடுமையான விளைவுகளைச் சந்திக்க நேரிடும் என எச்சரித்தார். இறுதியாக, அம்மாவின் தொண்டர்கள் அனைவரும் ஒன்றாக இணைய வேண்டும் என்றும், ‘சரியான அதிமுக’வை மட்டுமே அமமுக ஆதரிக்கும் என்றும் அவர் குறிப்பிட்டார்.