KKR பந்துவீச்சை துவம்சம் செய்த சுப்மன் கில்… “50 பந்துகளுக்கு 86 ரன்கள் போதுமா?”… அகமதாபாத்தில் கில் செய்த மேஜிக்…!

ஐபிஎல் தொடரின் 25-வது லீக் போட்டியில் கொல்கத்தா நைட் ரைடர்ஸ் அணியை எதிர்த்து குஜராத் டைட்டன்ஸ் அணி விளையாடி வருகிறது. முதலில் பேட்டிங் செய்த கேகேஆர் அணி, கேமரூன் க்ரீனின் (79 ரன்கள்) பொறுப்பான ஆட்டத்தால் 20 ஓவர்களில் 180 ரன்கள் எடுத்து ஆட்டமிழந்தது. 181 ரன்கள் என்ற இலக்கை நோக்கி களம் புகுந்த குஜராத் அணிக்கு, கேப்டன் சுப்மன் கில் மற்றும் சாய் சுதர்சன் ஜோடி அதிரடியான தொடக்கத்தைத் தந்தது. குறிப்பாக சுப்மன் கில் ஆரம்பம் முதலே பவுண்டரிகளையும் சிக்ஸர்களையும் பறக்கவிட்டு மைதானத்தை அதிரவைத்தார்.

ஆட்டத்தின் தொடக்கத்தில் மிகத் தீவிரமாக விளையாடிய கில், கார்த்திக் தியாகி மற்றும் அனுகுல் ராய் ஓவர்களில் சிக்ஸர்களை விளாசி பவர் பிளே முடிவில் 15 பந்துகளில் 34 ரன்கள் குவித்தார். பின்னர் ஆட்டம் சற்று நிதானமடைந்தாலும், 27 பந்துகளில் தனது அரைசதத்தைப் பூர்த்தி செய்தார். இதன் மூலம் ஐபிஎல் தொடரில் தனது ஹேட்ரிக் அரைசதத்தைப் பதிவு செய்து அசத்தினார். அகமதாபாத் மைதானத்தில் தனது அபாரமான ஃபார்மைத் தொடர்ந்த அவர், சதமடிப்பார் என்று ரசிகர்கள் ஆவலுடன் எதிர்பார்த்தனர்.

இருப்பினும், 50 பந்துகளில் 86 ரன்கள் எடுத்திருந்த நிலையில் சுப்மன் கில் துரதிர்ஷ்டவசமாக ஆட்டமிழந்தார். அவரது இன்னிங்ஸில் 8 பவுண்டரிகள் மற்றும் 4 சிக்ஸர்கள் அடங்கும். ஒருபுறம் கில்லின் ஆட்டம் அணிக்கு வலுவான அடித்தளத்தை அமைத்துக் கொடுத்தாலும், அரைசதம் கடந்த பிறகு அவரது வேகம் சற்று குறைந்தது விவாதத்தை ஏற்படுத்தியுள்ளது. 44 ரன்களில் இருந்து 50 ரன்களை எட்ட அவர் 8 பந்துகளை எடுத்துக் கொண்டது குறிப்பிடத்தக்கது.

தற்போதைய டி20 கிரிக்கெட் சூழலில், 50 பந்துகளை எதிர்கொள்ளும் ஒரு வீரர் குறைந்தது 200 ஸ்ட்ரைக் ரேட்டில் விளையாடினால் மட்டுமே அது அணிக்கு முழுமையான பலனைத் தரும் என்று விமர்சகர்கள் கருத்து தெரிவிக்கின்றனர். இந்தப் போட்டியில் கில்லின் ஸ்ட்ரைக் ரேட் 172 ஆக மட்டுமே இருந்தது. ஒரு கேப்டனாக பொறுப்பான ஆட்டத்தை வெளிப்படுத்தினாலும், வரும் போட்டிகளில் தனது அதிரடியை இறுதிவரை தக்கவைக்க வேண்டிய கட்டாயத்தில் அவர் உள்ளார்.