“எனக்கு கன்னிப்பெண் தான் வேணும்”… ஐஐடி மாப்பிள்ளையின் விசித்திர நிபந்தனை… மேட்ரிமோனி மேனேஜரின் அதிரடிப் பதிவு…!

கல்வித் தகுதியும், கைநிறையச் சம்பளமும் ஒரு மனிதனின் சமூக அந்தஸ்தை உயர்த்திவிடலாம், ஆனால் அவை அந்த மனிதனின் சிந்தனைப் போக்கை உயர்த்திவிடுமா என்ற கேள்வியை அண்மையில் சமூக வலைதளங்களில் வைரலாகி வரும் ஒரு சம்பவம் எழுப்பியுள்ளது. ஐஐடி-யில் பயின்று, ஒரு பில்லியன் டாலர் மதிப்புள்ள நிறுவனத்தில் இயக்குநராகப் பணியாற்றும் 37 வயது நபர், தனது இரண்டாவது திருமணத்திற்காக வைத்த விசித்திரமான நிபந்தனைகள் இப்போது கடும் கண்டனத்திற்கு உள்ளாகியுள்ளன. அதிகாரம் மிக்க பதவியிலும், வசதியான சூழலிலும் இருக்கும் ஒருவரின் மனநிலை இவ்வளவு குறுகியதாக இருப்பதா என நெட்டிசன்கள் கேள்வி எழுப்பி வருகின்றனர்.

தனது திருமண வரனைத் தேடுவதற்காக ஓஎந்திரிலா கபூர் (Oendrila) என்ற மேட்ரிமோனியல் மேனேஜரை அணுகிய அந்த நபர், தனக்கு வரப்போகும் பெண் 30 வயதிற்குள் இருக்க வேண்டும், பிராமண சமூகத்தைச் சேர்ந்தவராக இருக்க வேண்டும் மற்றும் இதுவரை யாருடனும் காதல் அல்லது உடல் ரீதியான உறவில் ஈடுபடாத ‘கன்னியாக’ இருக்க வேண்டும் என்று நிபந்தனை விதித்துள்ளார். தான் ஏற்கனவே திருமணமானவர், விவாகரத்து பெற்றவர் என்பதைச் சற்றும் பொருட்படுத்தாமல், தனக்கு மட்டும் ஒரு கன்னிப் பெண் தான் வேண்டும் என்பதில் அவர் பிடிவாதமாக இருந்துள்ளார். இந்த இரட்டை நிலைப்பாடுதான் தற்போது இணையத்தில் மிகப்பெரிய விவாதப் பொருளாக மாறியுள்ளது.

இதற்கு அவர் கூறிய காரணம் இன்னும் அதிர்ச்சியளிப்பதாக இருந்தது. “திருமணத்திற்கு முன்பு உறவில் இருந்த பெண்கள், திருமணத்திற்குப் பிறகு கணவருக்கு விசுவாசமாக இருக்க மாட்டார்கள்” என ஏதோ ஒரு ஆய்வைக் மேற்கோள் காட்டி அவர் வாதிட்டுள்ளார். இதற்குப் பதிலடியாக, “அதே லாஜிக் விவாகரத்தான உங்களுக்கும் பொருந்துமே?” என ஓஎந்திரிலா கேட்டதற்கு, “நான் ஒரு ஆண், என்னை இதோடு ஒப்பிட முடியாது” என மிகவும் அலட்சியமாகவும், ஆணாதிக்க மனோபாவத்துடனும் அவர் பதிலளித்துள்ளார். அறிவியலும் கல்வியும் வளர்ந்த இந்த காலத்திலும், பாலின பாகுபாட்டை நியாயப்படுத்தும் இத்தகைய சிந்தனை பலரையும் முகம் சுளிக்க வைத்துள்ளது.

இறுதியில், அந்த நபரின் விண்ணப்பத்தை ஏற்க மறுத்த ஓஎந்திரிலா கபூர், “உங்களிடம் தான் பெரிய பிரச்சனை உள்ளது” என்று முகத்தில் அறைந்தாற்போலக் கூறி அவரை நிராகரித்துவிட்டார். இந்தச் சம்பவம் சமூக வலைதளங்களில் பரவியதைத் தொடர்ந்து, “படிப்பும் பணமும் மட்டும் ஒருவரை முழுமையான மனிதனாக்கி விடாது; சுயநலமும் ஆணாதிக்கமும் கலந்த இத்தகைய எண்ணங்கள் சமூகத்திற்கு ஆபத்தானவை” எனப் பெரும்பான்மையான மக்கள் கருத்து தெரிவித்து வருகின்றனர். அதே வேளையில், துணைவியைத் தேர்ந்தெடுக்கும் உரிமை அவருக்கு உண்டு என ஒரு சிலர் வாதிட்டாலும், ஒரு பெண்ணை வெறும் ‘பொருளாக’ பார்க்கும் அவரது தரம் தாழ்ந்த அணுகுமுறையே இங்குப் பலத்த கண்டனத்திற்குள்ளாகி இருக்கிறது.