“என் பிள்ளைங்களை கொன்னுட்டேன் சார்” மனைவி மீது சந்தேகம்… பாத்ரூம் வரை கேமரா.. மகள்களுக்குத் தூக்க மாத்திரை கொடுத்துக் கொன்ற தந்தை… அதிரவைக்கும் வாக்குமூலம்..!!

கான்பூரைச் சேர்ந்த 45 வயதான சசி ரஞ்சன் மிஸ்ரா என்பவர், தனது 11 வயது இரட்டைப் பெண் குழந்தைகளை கொடூரமாகக் கொலை செய்த குற்றத்திற்காகக் கைது செய்யப்பட்டுள்ளார். அவர் தீவிரமான மனச்சோர்வு (Depression) மற்றும் அதீத சந்தேக உணர்வால் (Paranoia) பாதிக்கப்பட்டிருந்தது முதற்கட்ட விசாரணையில் தெரியவந்துள்ளது. தனது மனைவிக்கு வேறொருவருடன் தொடர்பு இருப்பதாகச் சந்தேகித்த அவர், வீட்டின் மூலைமுடுக்கெல்லாம், கடைசியாகக் குளியலறையில் கூட கேமராக்களைப் பொருத்தி கண்காணித்து வந்துள்ளார்.

சம்பவத்தன்று இரவு, தனது இரு மகள்களுக்கும் தூக்க மாத்திரைகளைக் கொடுத்து மயக்கமடையச் செய்துள்ளார். அவர்கள் சுயநினைவற்ற நிலையில் இருந்தபோது, அவர்களைக் கழுத்தை நெரித்துக் கொலை செய்துள்ளார். இச்சம்பவம் நடந்தபோது அவரது மனைவியும், 6 வயது மகனும் மற்றொரு அறையில் உறங்கிக் கொண்டிருந்ததால், அவர்களுக்கு எதுவும் தெரியவில்லை. கொலையைச் செய்த பிறகு அவர் தப்பியோடவோ அல்லது ஆதாரங்களை மறைக்கவோ முயலவில்லை என்பதுதான் இதில் அதிர்ச்சியூட்டும் விஷயம்.

அதிகாலை 4 மணி அளவில், தனது குழந்தைகளின் சடலங்களுக்கு அருகிலேயே அமர்ந்து கொண்டு, அவசரக் காவல் எண்ணான 112-க்கு அவரே அழைத்துத் தகவல் கொடுத்துள்ளார். காவல்துறை சம்பவ இடத்திற்கு வந்தபோது அங்கிருந்த காட்சி மிகக் கொடூரமாக இருந்தது. அதிர்ச்சியில் உறைந்துள்ள அவரது மனைவியிடம் நடத்திய விசாரணையில், மிஸ்ரா நீண்ட காலமாக மனநலப் பாதிப்பில் இருந்ததும், அதற்காக மருந்துகள் உட்கொண்டு வந்ததும் தெரியவந்தது. அவரது அறையிலிருந்து கொலைக்கு பயன்படுத்திய பொருட்கள் மற்றும் ஏராளமான மாத்திரைகளை காவல்துறையினர் பறிமுதல் செய்துள்ளனர்.