உஷார்! உங்க போனுக்கும் இந்த மெசேஜ் வரலாம்… வடமாநில கும்பலின் மார்பிங் மிரட்டலுக்கு பலியான 20 வயது இளைஞர்… வெறும் 3000 ரூபாய் கடனுக்கு இப்படியா…!

ஆன்லைன் கடன் செயலிகளின் பேராசைக்கும், டிஜிட்டல் மிரட்டல்களுக்கும் மற்றுமொரு இளம் உயிர் பலியாகியிருக்கும் சம்பவம் தமிழகத்தையே உலுக்கியுள்ளது. தூத்துக்குடி மாவட்டம் காயல்பட்டினத்தைச் சேர்ந்த 20 வயது இளைஞர் சாமுவேல்ராஜ், ஆன்லைன் செயலி மூலம் வெறும் 3000 ரூபாய் கடன் வாங்கியுள்ளார். அதன்பின், வடமாநிலக் கும்பல் ஒன்று அவரிடம் அநியாயக் வட்டி கேட்டு மிரட்டியதோடு, அவரது புகைப்படத்தை ஆபாசமாக மார்பிங் செய்து வாட்ஸ்அப்பில் அனுப்பி சமூக வலைதளங்களில் பரப்புவதாக மிரட்டியுள்ளது. இந்த அவமானத்திற்கும் பயத்திற்கும் அஞ்சி, அந்த இளைஞர் காட்டுப்பகுதியில் தூக்கிட்டுத் தற்கொலை செய்துகொண்ட நெஞ்சைப் பிளக்கும் துயரம் திருச்செந்தூர் அருகே நடந்துள்ளது.

அவசரத் தேவைக்காகப் பொதுமக்கள் தரவிறக்கம் செய்யும் பல போலி கடன் செயலிகள், ரிசர்வ் வங்கியின் அங்கீகாரம் இல்லாதவை ஆகும். இவை கடனை வழங்கும்போதே மொபைலில் உள்ள புகைப்படங்கள், தொடர்புகள் போன்ற தனிப்பட்ட தரவுகளைத் திருடிவிடுகின்றன. பின்னர், வாங்கிய கடனை விடப் பல மடங்கு பணத்தைக் கேட்டு, இந்தத் தரவுகளை வைத்தே வாடிக்கையாளர்களைக் கொடூரமாக மிரட்டுகின்றன. இந்த விவகாரத்தில் சாமுவேல்ராஜின் குடும்பத்தினர் அளித்த புகாரின் பேரில் ஆறுமுகநேரி காவல்துறையினர் உடலைக் கைப்பற்றி தீவிர விசாரணை நடத்தி வருகின்றனர்.

இதுபோன்ற சைபர் மிரட்டல்களை எதிர்கொள்ளும் எவரும் எக்காரணம் கொண்டும் பயந்து விபரீத முடிவுகளை எடுக்கக் கூடாது. உங்களுக்கு மிரட்டல் விடுக்கப்பட்டால், உடனடியாக மத்திய அரசின் சைபர் குற்ற அவசர உதவி எண்ணான 1930 ஐத் தொடர்பு கொள்ளலாம் அல்லது www.cybercrime.gov.in என்ற இணையதளத்தில் ஆன்லைனில் புகார் அளிக்கலாம். மேலும், ரிசர்வ் வங்கியின் Sachet Portal வழியாகவும் இந்த போலி செயலிகள் மீது நடவடிக்கை எடுக்க முடியும். உங்கள் தனிப்பட்ட தரவுகள் மற்றும் மார்பிங் ஆதாரங்களுடன் உள்ளூர் சைபர் க்ரைம் போலீசாரிடம் தைரியமாகப் புகார் அளிப்பதே இதற்குச் சரியான தீர்வாகும்.

மன அழுத்தமோ அல்லது தற்கொலை எண்ணமோ தோன்றினால், அதிலிருந்து விடுபடத் தமிழக அரசு மற்றும் தன்னார்வ அமைப்புகள் பல உதவி எண்களை வழங்குகின்றன. மாநில சுகாதாரத் துறையின் உதவி எண் 104 அல்லது சினேகா தற்கொலை தடுப்பு உதவி எண் 044-24640050 ஆகியவற்றைத் தொடர்பு கொண்டு உரிய ஆலோசனைகளைப் பெறலாம். சட்டத்தின் துணையும், மன தைரியமும் இருந்தால் இதுபோன்ற மோசடிக் கும்பல்களை எளிதாக முறியடிக்க முடியும் என்பதால், பொதுமக்கள் விழிப்புணர்வுடன் இருக்க வேண்டியது அவசியமாகும்.