“அடப்பாவி… குழந்தைக்கு 1.39 கோடியா?… அதுக்கு பதிலா BMW வாங்கலாம்… இன்ஸ்டாகிராம் பிரபலத்தின் ஷாக்கிங் வீடியோ… கொந்தளித்த நெட்டிசென்கள்…!”

இந்தியாவில் 18 வயது வரை ஒரு குழந்தையை வளர்ப்பதற்குச் சுமார் ரூ 1.39 கோடி செலவாகும் என்றும், இதனால் தான் குழந்தை பெற்றுக்கொள்ள விரும்பவில்லை என்றும் ‘விக்யாத்’ என்ற இன்ஸ்டாகிராம் கிரியேட்டர் வெளியிட்ட வீடியோ சமூக வலைத்தளங்களில் பெரும் விவாதத்தைக் கிளப்பியுள்ளது. கர்ப்பகால மருத்துவச் செலவுகள், முதல் இரண்டு ஆண்டுகளுக்கான பராமரிப்பு , கல்வி மற்றும் கல்விக் கட்டணங்கள், உணவு, உடை, மருத்துவம், பொழுதுபோக்கு மற்றும் கூடுதல் அறை கொண்ட வீட்டை வாடகைக்கு எடுப்பதற்கான செலவு உள்ளிட்ட பல்வேறு அம்சங்களைக் கணக்கிட்டு இந்தத் தொகையை அவர் முன்வைத்துள்ளார்.

இந்தக் கணக்கீட்டை விட, குழந்தை வளர்ப்புச் செலவை BMW M4 Competition என்ற சொகுசு காரை வாங்குவதோடு அவர் ஒப்பிட்டுப் பேசியதே இணையத்தில் மிகப்பெரிய சர்ச்சையாக மாறியது. குழந்தையை வளர்ப்பதற்கு இவ்வளவு தொகையைச் செலவழிப்பதற்குப் பதிலாக, அந்தப் பணத்தில் உயர்தர சொகுசு காரை வாங்கிவிடலாம் என்று அவர் கூறியது பலரின் கண்டனத்திற்கு உள்ளானது. ஒரு மனித உயிரையும் பெற்றோர் என்ற புனிதமான உணர்வையும் வெறும் நிதிச் செலவாகவும், பொருள் சார்ந்த ஒப்பீடாகவும் அவர் சுருக்கிவிட்டார் என்று பலரும் விமர்சித்தனர்.

இந்த வீடியோ இன்ஸ்டாகிராம் மற்றும் ‘எக்ஸ்’ தளங்களில் வைரலானதை அடுத்து, பயனர்களிடையே காரசாரமான விவாதங்கள் எழுந்துள்ளன. இன்றைய காலகட்டத்தில் குழந்தை வளர்ப்புச் செலவுகள் மிகவும் அதிகரித்துவிட்டன என்பதை சிலர் ஒப்புக்கொண்ட போதிலும், பெரும்பாலான பெற்றோர் மற்றும் பயனர்கள் அவரது கருத்தைக் கடுமையாக மறுத்தனர். ஒரு குழந்தையின் புன்னகையையும், அது தரும் அளப்பரிய அன்பையும் மகிழ்ச்சியையும் பணத்தால் ஒருபோதும் மதிப்பிட முடியாது என்றும், உயிருள்ள மனித உறவை காரோடு ஒப்பிடுவது தவறானது என்றும் அவர்கள் கருத்து தெரிவித்து வருகின்றனர்.