எடப்பாடிக்கு அதிர்ச்சி வைத்தியம் தந்த செங்கோட்டையன்…. வெளியான “ரகசிய கூட்டணி”… தமிழக அரசியலில் திடீர் திருப்பம்….!

தமிழக அரசியலில் சட்டமன்றத் தேர்தலுக்குப் பிந்தைய களம், புதிய கட்சிகளின் வரவாலும் உட்கட்சிப் பூசல்களாலும் பெரும் பரபரப்பைச் சந்தித்து வருகிறது. குறிப்பாக, நடிகர் விஜய்யின் தமிழக வெற்றிக் கழகத்தின் அசுர வளர்ச்சியும், அதிமுகவிலிருந்து முக்கிய நிர்வாகிகள் தவெக நோக்கித் படையெடுப்பதும் தற்போதைய முக்கிய விவாதப் பொருளாக மாறியுள்ளது. தவெக ஆட்சிக்கு வருவதைத் தடுப்பதற்காக ஆளும் திமுகவும், பிரதான எதிர்க்கட்சியான அதிமுகவும் கைகோர்த்து ரகசியச் சதித்திட்டம் தீட்டி வருவதாகப் பரவலான புகார்கள் எழுந்துள்ளன.

இந்நிலையில், கோவையில் செய்தியாளர்களைச் சந்தித்த அமைச்சர் செங்கோட்டையன், அதிமுக பொதுச்செயலாளர் எடப்பாடி பழனிசாமி மீது மிகக் கடுமையான அரசியல் குற்றச்சாட்டுகளை முன்வைத்துள்ளார். எடப்பாடி பழனிசாமி எதிர்க்கட்சித் தலைவராக இருந்தபோதே தனது பதவியைக் காப்பாற்றிக் கொள்வதற்காக திமுகவுடன் ரகசியக் கூட்டணி வைத்திருந்தார் என்ற பகீர் தகவலை அவர் உடைத்துள்ளார். மேலும், ஜெயலலிதாவைச் சிறையில் அடைத்த திமுகவுடன் கைகோர்க்கத் துணியும் எடப்பாடியால் இனி அதிமுகவைக் காப்பாற்ற முடியாது என்றும், அதன் கொள்கை சறுக்கல்களாலேயே தொண்டர்கள் தவெகவை நோக்கிச் செல்கிறார்கள் என்றும் அவர் சாடியுள்ளார். தவெக தலைவர் தளபதி விஜய் நல்லாட்சி தருவார் என்ற நம்பிக்கையில்தான் மக்கள் அவர் பின்னால் அணிவகுப்பதாகக் குறிப்பிட்ட அவர், 47 எம்எல்ஏக்களை வைத்துக் கொண்டு எடப்பாடி எப்படி மீண்டும் முதலமைச்சராக முடியும் என்றும் கேள்வி எழுப்பியுள்ளார்.

அரசியல் நகர்வுகள் ஒருபுறமிருக்க, தமிழக அரசின் நிர்வாக ரீதியிலான முக்கிய நடவடிக்கைகள் குறித்தும் அமைச்சர் விரிவாகப் பேசினார். உள்ளாட்சித் தேர்தலுக்கு முன்னதாக மக்கள் தொகை அடிப்படையில் வார்டுகள் வரையறுக்கப்படும் என்றும், உரம் பதுக்கலில் ஈடுபடுவோர் மீது கடுமையான நடவடிக்கைகள் பாயும் என்றும் அவர் எச்சரித்தார். அதேபோல், கேரளாவிற்கு கனிம வளங்கள் கடத்தப்படுவதைத் தடுக்கச் சோதனைச் சாவடிகள் பலப்படுத்தப்பட்டு, தற்காலிகமாக அரசாணை பிறப்பிக்கப்பட்டுள்ளது என்றும், கர்நாடகாவின் கழிவுநீரால் மாசடைந்துள்ள கெலவரப்பள்ளி அணையைத் தூய்மைப்படுத்த மாசுக்கட்டுப்பாட்டு வாரியம் மூலம் தீவிரக் கண்காணிப்பு மேற்கொள்ளப்பட்டு வருவதாகவும் அவர் உறுதியளித்தார்.

இறுதியாக, மேகதாது அணை விவகாரம் குறித்துப் பேசிய பாமக தலைவர் அன்புமணி ராமதாஸின் கருத்திற்கு அமைச்சர் கண்டனம் தெரிவித்தார். மேகதாது அணை கட்டப்பட்டால் ஒரு லட்சம் வீரப்பன்கள் உருவாவார்கள் என்று அன்புமணி பேசியது வன்முறையைத் தூண்டும் விதமாக உள்ளதால் அது ஏற்புடையதல்ல என்றும், எந்தவொரு மாநிலப் பிரச்சனையையும் நாம் சட்ட ரீதியாகவே எதிர்கொள்ள வேண்டும் என்றும் அறிவுறுத்தினார். காவிரி விவகாரத்தில் கர்நாடகா உரிய காலத்தில் தண்ணீர் தராமல் தொடர்ந்து புறக்கணிப்பது கண்டனத்திற்குரியது என்றாலும், உரிமைகளை அமைதியான வழியில்தான் வென்றெடுக்க வேண்டும் என்று கூறி தனது பேட்டியை நிறைவு செய்தார்.