ஈராக், ஈரானை கைப்பற்றினால் தான்.. மாசத்துக்கு 6 சிலிண்டர் கொடுக்க முடியும்… CM விஜய்யை சீண்டிய சீமான்..!!

மறைமலைநகரில் நடைபெற்ற முள்ளிவாய்க்கால் நினைவு நாள் பொதுக்கூட்டத்தில் பேசிய நாம் தமிழர் கட்சியின் தலைமை ஒருங்கிணைப்பாளர் சீமான், தேர்தலில் தங்களுக்கு ஏற்பட்டுள்ள தோல்விகள் தங்களை ஒருபோதும் முடக்காது என்று திட்டவட்டமாகத் தெரிவித்தார். காற்றடித்தால் பறந்து போவதற்குத் தங்கள் கட்சி சருகுகள் அல்ல என்றும், அற்பத் தேர்தல்களில் வரும் தோல்விகளை கண்டு பின்னோக்கிச் செல்ல மாட்டோம் என்றும் குறிப்பிட்டார். மேலும், மக்கள் தங்கள் அரசியலைப் புரிந்து கொள்ள இன்னும் 25 ஆண்டுகள் ஆகும் என்றும், தற்போதைய சூழலில் மக்களுக்குத் தேவை கொள்கை சார்ந்த கருத்துக்கள் அல்ல, மாறாகக் கவர்ச்சிதான் என்றும் அவர் சாடினார்.

மக்களின் வாக்குரிமை மற்றும் நாட்டின் பொருளாதார நிலை குறித்துப் பேசிய அவர், வேட்பாளர் யார், அவரது கல்வித் தகுதி மற்றும் உழைக்கும் திறன் என்ன என்பதைக்கூடப் பார்க்காமல் வாக்களிக்கும் சூழலே நிலவுவதாகக் கவலை தெரிவித்தார். ஜனநாயகம் குறித்து ஹிட்லர் கூறியதை மேற்கோள் காட்டிய சீமான், மக்கள் ஒருபோதும் அறிவுத் தலைமையைத் தேடாமல் கவர்ச்சியை நோக்கித்தான் செல்வார்கள் என்றார். தமிழகத்தில் தற்போது 10 லட்சம் கோடி ரூபாய் கடன் உள்ள நிலையில், வட்டி கட்டவே 5 லட்சம் கோடி ரூபாய் சென்றுவிடும் என்றும், இந்த லட்சணத்தில் தற்போதைய அரசு அறிவித்துள்ள இலவசங்களையோ அல்லது 6 சிலிண்டர்களையோ வழங்குவது சாத்தியமற்றது என்றும் விமர்சித்தார்.

இலவச சிலிண்டர் திட்டங்கள் குறித்துக் கடுமையான விமர்சனங்களை முன்வைத்த அவர், தற்போதைய அரசு ஈராக் மற்றும் ஈரான் நாடுகளைக் கைப்பற்றினால்தான் 6 சிலிண்டர்களை இலவசமாகக் கொடுக்க முடியும் என்று கிண்டலாகக் குறிப்பிட்டார். தான் இயற்கை வேளாண் விஞ்ஞானி நம்மாழ்வாரின் மகன் என்று பெருமிதத்துடன் கூறிய சீமான், மாட்டுச் சாணத்திலிருந்து எரிவாயு தயாரித்துக் கொடுக்கத் தம்மால் முடியும் என்றார். படித்த இளைஞர்களுக்கு மாதந்தோறும் 4,000 ரூபாய் கொடுப்பதாகக் கூறிவிட்டு, இப்போது கடன் சுமையைக் காரணம் காட்டி அரசு ஏமாற்றி வருவதாகவும் அவர் குற்றம் சாட்டினார்.

இறுதியாக, 35 ஆண்டுகளுக்கும் மேலாக ஒரு தலைமுறை தாண்டி வாழும் இரண்டு லட்சத்திற்கும் மேற்பட்ட ஈழத் தமிழர்களுக்குக் குடியுரிமை வழங்குவதில் என்ன சிக்கல் உள்ளது என்று கேள்வி எழுப்பிய அவர், தாங்கள் கடந்த 15 ஆண்டுகாலமாக இந்த மண்ணிற்காகத் தொடர்ந்து போராடி வருவதாகக் கூறினார். விடுதலை நெருப்பை அணையவிடாமல் பற்ற வைக்குமாறு தொண்டர்களுக்கு அழைப்பு விடுத்த சீமான், நாம் தமிழர் கட்சி இறுதிச் சுற்று ஓட்டத்தைத் துவக்கியுள்ளதாகவும், வரவிருக்கும் உள்ளாட்சி, நாடாளுமன்றம் மற்றும் 2031 சட்டமன்றத் தேர்தல் என அனைத்திலும் வழக்கம் போல் அனைத்துத் தொகுதிகளிலும் தனித்தே போட்டியிடும் என்றும் பிரகடனப்படுத்தினார்.