நிலம் வாங்குபவர்களுக்கு ஷாக்… பீகாரில் அதிரடி உயர்வு… 2 மடங்கு உயர்ந்த பதிவு கட்டணம்… அடுத்து தமிழகத்திலும் உயருமா…?

பீகார் அரசு நிலத்தின் குறைந்தபட்ச மதிப்புப் பதிவேட்டை மாற்றியமைத்துள்ளதால், ஜூன் 19 முதல் நகர்ப்புற, கிராமப்புற மற்றும் புறநகர்ப் பகுதிகளில் நிலப் பதிவுக் கட்டணங்கள் கணிசமாக உயர்ந்துள்ளன. இந்த மண்டல வாரியான மாற்றத்தின்படி, நகர்ப்புற மற்றும் புறநகர்ப் பகுதிகளில் பதிவுக் கட்டணங்கள் சுமார் 2 மடங்கும், கிராமப்புறங்களில் 1.6 மடங்கும் அதிகரித்துள்ளன. மேலும், முத்திரைத்தாள் கட்டணம் 6%-லிருந்து 7%-ஆக உயர்த்தப்பட்டுள்ளது. இந்த மதிப்பு உயர்வால் வங்கிகள் சொத்துக்களின் மீது அதிக கடன் வழங்க வாய்ப்புள்ளதோடு, நில ஆவணங்களில் வெளிப்படைத்தன்மை அதிகரித்து முறைகேடுகள் குறையும் என பீகார் அரசு நம்புகிறது.

தமிழ்நாடு அரசு சமீபத்தில் வெளியிட்ட வெள்ளை அறிக்கையில், முத்திரைத்தாள் கட்டணம் சந்தை மதிப்பை விட குறைவாக உள்ளதாகக் குறிப்பிட்டுள்ளதால், இங்கும் விரைவில் கட்டண உயர்வு வரலாம் என எதிர்பார்க்கப்படுகிறது. முன்னதாக, கடந்த 2023ஆம் ஆண்டில் 100 ரூபாய் முத்திரைத்தாள் 1000 ரூபாயாகவும், 20 ரூபாய் முத்திரைத்தாள் 200 ரூபாயாகவும் உயர்த்தப்பட்டது குறிப்பிடத்தக்கது. எனினும், பீகாரைப் போல உடனடியாக இங்கு 2 மடங்கு கட்டண உயர்வு ஏற்படுவதற்கான சாத்தியக்கூறுகள் மிகக் குறைவு என்று நிபுணர்கள் கருதுகின்றனர்.

பீகாரில் சொத்துக்களின் குறைந்தபட்ச சந்தை மதிப்பு மிகக் குறைவாக இருந்ததால் தற்போது அங்கு இரு மடங்கு வரை கட்டணம் உயர்ந்துள்ளது. ஆனால், தமிழகத்தில் ஏற்கனவே பல பகுதிகளில் வழிகாட்டி மதிப்பு சந்தை மதிப்புக்கு நிகராகச் சீரமைக்கப்பட்டுள்ளது. மேலும், தமிழகத்தில் தற்போது நிலப் பதிவுக் கட்டணம் 11% ஆக இருப்பதாலும், சமீபத்தில்தான் சேவை கட்டணங்கள் உயர்த்தப்பட்டதாலும், உடனடியாக பொதுவான நிலப் பதிவுக் கட்டணங்கள் மேலும் உயர்வதற்கு வாய்ப்பில்லை என்று துறை சார்ந்த நிபுணர்கள் தெளிவுபடுத்துகின்றனர்.