“தேர்தல் முடியட்டும்.. அப்புறம் இருக்கு கச்சேரி”… ஈரான் – அமெரிக்கா மோதலால் இந்தியாவுக்கு வரப்போகும் மிகப்பெரிய ஆபத்து…!

இந்தியாவில் தற்போது நடைபெற்று வரும் சட்டசபை தேர்தல்கள் நிறைவடைந்தவுடன், பெட்ரோல் மற்றும் டீசல் விலைகள் லிட்டருக்கு ரூ.25 முதல் ரூ.28 வரை அதிரடியாக உயர வாய்ப்புள்ளதாக கோடக் இன்ஸ்டிடியூஷனல் எக்விட்டிஸ் (Kotak Institutional Equities) நிறுவனம் தெரிவித்துள்ளது. சர்வதேச சந்தையில் கச்சா எண்ணெய் விலை உயர்ந்து வரும் நிலையிலும், தேர்தல் சூழலால் இந்தியாவில் எண்ணெய் நிறுவனங்கள் விலையை உயர்த்தாமல் தற்காலிகமாக நிறுத்தி வைத்துள்ளன. ஏப்ரல் 29-ஆம் தேதியுடன் தேர்தல் நடைமுறைகள் முடிவுக்கு வருவதால், அதற்குப் பிறகு இந்த விலையேற்றம் அமல்படுத்தப்படலாம் என எதிர்பார்க்கப்படுகிறது.

சர்வதேச அளவில் ஈரான் மற்றும் அமெரிக்கா இடையே நிலவி வரும் போர் பதற்றம் கச்சா எண்ணெய் வர்த்தகத்தை கடுமையாக பாதித்துள்ளது. குறிப்பாக, ஈரான் தனது கட்டுப்பாட்டில் உள்ள ஹார்முஸ் ஜலசந்தியை மூடி வைத்துள்ளதால் உலகளாவிய எண்ணெய் விநியோகத்தில் சிக்கல் ஏற்பட்டுள்ளது. இதன் விளைவாக கச்சா எண்ணெய் விலைகள் தொடர்ந்து ஏறுமுகத்திலேயே உள்ளன. இந்த விலையேற்றம் இந்தியாவின் கச்சா எண்ணெய் சுத்திகரிப்பு நிறுவனங்களுக்கு மிகப்பெரிய நிதிச்சுமையை ஏற்படுத்தி வருவதோடு, நாட்டின் கச்சா எண்ணெய் இருப்பும் படிப்படியாகக் குறைந்து வருகிறது.

கோடக் செக்யூரிட்டீஸ் நிறுவனத்தின் ஆய்வின்படி, கடந்த மார்ச் மற்றும் ஏப்ரல் மாதங்களில் இந்தியாவின் கச்சா எண்ணெய் இறக்குமதி செலவு பன்மடங்கு அதிகரித்துள்ளது. இறக்குமதி செய்யப்படும் எண்ணெய்ப் பொருட்களின் அளவு 13-15% குறைந்திருந்தாலும், ஒரு நாளைக்கு சுமார் 190 முதல் 210 மில்லியன் டாலர் வரை கூடுதல் செலவு ஏற்படுகிறது. உள்நாட்டில் பெட்ரோல், டீசல் விலைகள் மாற்றப்படாமல் இருப்பதால், பொதுத்துறை எண்ணெய் நிறுவனங்களுக்கு மாதம் தோறும் சுமார் ரூ.270 பில்லியன் கூடுதல் நிதி இழப்பு ஏற்படுவதாக அந்த அறிக்கை சுட்டிக்காட்டுகிறது.

சர்வதேச சந்தையில் கச்சா எண்ணெய் விலை ஒரு பேரல் 120 டாலர் என்ற நிலையை எட்டும்போது, எண்ணெய் நிறுவனங்கள் தங்களின் நஷ்டத்தைச் சரிசெய்ய தற்போதைய விலையை விட ரூ.25 முதல் ரூ.28 வரை உயர்த்த வேண்டிய கட்டாயத்தில் உள்ளன. தற்போதைய அரசியல் சூழல் மற்றும் தேர்தல் காரணங்களால் தடுத்து வைக்கப்பட்டுள்ள இந்த விலையேற்றம், மே மாத தொடக்கத்தில் சாமானிய மக்களின் பட்ஜெட்டில் பெரிய தாக்கத்தை ஏற்படுத்தும் எனத் தெரிகிறது. நாட்டின் முன்னணி முதலீட்டு நிறுவனமான கோடக் வெளியிட்டுள்ள இந்தத் தகவல் வாகன ஓட்டிகளிடையே பெரும் கவலையை ஏற்படுத்தியுள்ளது.