“6 கோடி மோசடி”, “வசூல் வேட்டை”…. தவெக பொதுச்செயலாளரை அதிரவைத்த இயக்குனர் பிரபு ராஜா… விஜய் கட்சிக்கு கடைசி நேரத்தில் விழுந்த செக்…!

தமிழக சட்டசபை தேர்தல் வாக்குப்பதிவு இன்று தொடங்க உள்ள நிலையில், தமிழக வெற்றிக் கழகத்தின் (தவெக) பொதுச்செயலாளர் புஸ்ஸி ஆனந்த் மீது எழுந்துள்ள ஊழல் மற்றும் மோசடி புகார்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. புதுக்கோட்டை மாவட்டம் அறந்தாங்கி தொகுதியைச் சேர்ந்த திரைப்பட இயக்குநரும், தவெக நிர்வாகியுமான எல்.எஸ். பிரபு ராஜா, தமிழக தலைமை தேர்தல் அதிகாரி அர்ச்சனா பட்நாயக்கை நேரில் சந்தித்து இந்தப் புகாரை அளித்துள்ளார். கட்சித் தலைவர் விஜய்யின் தீவிர ரசிகரான தான், மாற்று அரசியலை எதிர்பார்த்து கட்சியில் இணைந்ததாகவும், ஆனால் தவெகவின் செயல்பாடுகள் ஏமாற்றம் அளிப்பதாகவும் அவர் குற்றம்சாட்டியுள்ளார்.

பத்திரிகையாளர் சந்திப்பில் பேசிய பிரபு ராஜா, தவெகவில் வேட்பாளர் தேர்வு முறையாக நடைபெறவில்லை என்ற அதிர்ச்சி தகவலை வெளியிட்டார். ஒரு வருடத்திற்கு முன்பே புஸ்ஸி ஆனந்துக்கு சாதகமான நபர்கள் 234 தொகுதிகளுக்கும் ரகசியமாகத் தேர்வு செய்யப்பட்டதாகவும், தற்போது நடத்தப்பட்ட விருப்பமனு தாக்கல் என்பது வெறும் கண்துடைப்பு என்றும் அவர் சாடினார். விருப்பமனு அளித்த 5,000-க்கும் மேற்பட்டோரிடம் எந்தவித நேர்க்காணலும் நடத்தாமல், சுமார் ரூ. 5 கோடி முதல் ரூ. 6 கோடி வரை வசூல் செய்து நிதி மோசடியில் ஈடுபட்டுள்ளதாக புஸ்ஸி ஆனந்த் மீது அவர் நேரடித் தாக்குதலைத் தொடுத்துள்ளார்.

அறந்தாங்கி தொகுதியில் தான் பல நலத்திட்ட உதவிகளைச் செய்து கட்சியை வளர்த்தெடுத்த நிலையில், பணம் தர மறுத்த காரணத்தால் தமக்கு வாய்ப்பு மறுக்கப்பட்டதாக பிரபு ராஜா தெரிவித்தார். தமக்கு பதிலாக அறந்தாங்கியில் வேட்பாளராக நிறுத்தப்பட்டுள்ள முகமது பர்வேஸ் என்பவர் ஒரு ‘அடாவடி நபர்’ என்றும், அவர் மதரீதியாகப் பிளவுபடுத்தும் செயல்களில் ஈடுபடுவதற்கான ஆதாரங்கள் தன்னிடம் இருப்பதாகவும் அவர் குறிப்பிட்டார். ஊழலை ஒழிப்போம் என்று கூறிக்கொண்டு கட்சி நடத்தும் தவெக, விருப்பமனு கட்டணமாகப் பெறப்பட்ட ரூ. 10,000 டிடி-க்களைக் கொண்டு தி.நகர் தேர்தல் செலவுகளைச் செய்கிறதோ என்ற சந்தேகத்தையும் அவர் எழுப்பினார்.

தேர்தல் ஆணையத்திடம் அளிக்கப்பட்ட இந்தப் புகாரின் மீது உரிய நடவடிக்கை எடுப்பதாக தேர்தல் அதிகாரி அர்ச்சனா பட்நாயக் உறுதியளித்துள்ளதாகத் தெரிகிறது. கட்சியின் தலைவர் விஜய் மௌனம் காக்கும் வேளையில், அவரது வலதுகரமாகக் கருதப்படும் பொதுச்செயலாளர் மீது முன்வைக்கப்பட்டுள்ள இந்த நிதி மோசடி மற்றும் வேட்பாளர் விற்பனை புகார்கள், தேர்தலுக்கு முந்தைய நாளில் தமிழக வெற்றிக் கழகத்திற்கு பெரும் பின்னடைவாகவும், மற்ற அரசியல் கட்சியினரிடையே விவாதப் பொருளாகவும் மாறியுள்ளது.