தனுஷின் சூப்பர் ஹிட் படம்…! வில்லன் கதாபாத்திரத்தில் முதலில் நடிக்கவிருந்தது பார்த்திபன் தானாம்… அவரே சொன்ன தகவல்….!!

கடந்த 2011ஆம் ஆண்டு வெளியான ‘ஆடுகளம்’ திரைப்படம் தனுஷ் மற்றும் வெற்றிமாறன் இருவருக்கும் தேசிய விருதை பெற்றுத் தந்தது. சேவல் சண்டையை மையமாகக் கொண்ட இந்தப் படத்தில், சக்திவாய்ந்த வில்லன் கதாபாத்திரமான ‘பேட்டைக்காரன்’ வேடத்தில் இலங்கைத் தமிழரான வி.ஐ.எஸ். ஜெயபாலன் நடித்திருந்தார். இந்தப் பாத்திரத்தின் குரலுக்கு நடிகர் ராதாரவி டப்பிங் பேசியது கூடுதல் பலமாக அமைந்தது.

ஆனால், இந்த முக்கியமான பேட்டைக்காரன் கதாபாத்திரத்தில் முதலில் நடிக்க இருந்தது நடிகர் பார்த்திபன் தான் என்று அவர் சமீபத்தில் தெரிவித்துள்ளார். வெற்றிமாறன் முதலில் தன்னிடம்தான் இந்தக் கதையைச் சொன்னதாகவும் பார்த்திபன் குறிப்பிட்டுள்ளார்.

அப்போது பார்த்திபன், தனது சொந்த இயக்கத்தில் தனுஷுடன் ஒரு படத்தில் நடிப்பதற்குத் திட்டமிட்டிருந்தார். ஒரே நேரத்தில் ஒரே கதாநாயகனுடன் தொடர்ந்து இரண்டு படங்களில் நடித்தால், ஒரு படத்தின் எதிர்பார்ப்பு அடுத்த படத்தைப் பாதிக்கலாம் என்று கருதி, தானே நேரடியாக வெற்றிமாறனின் வீட்டிற்குச் சென்று, ‘ஆடுகளம்’ படத்தில் நடிக்க மறுத்துவிட்டதாகப் பார்த்திபன் கூறியுள்ளார்.