விஜய்யின் ‘நோ’… தப்பியோடும் 50,000 கோடி முதலீடுகள்?…. ஒரே முடிவால் பறிபோகும் 1 லட்சம் வேலைவாய்ப்புகள்.. தமிழக மக்களுக்கு செம ஷாக்….!

சென்னைக்கு அருகேயுள்ள பரந்தூரில் அமையவிருந்த இரண்டாவது சர்வதேச விமான நிலையத் திட்டத்திற்கு விஜய் தலைமையிலான தற்போதைய அரசு முட்டுக்கட்டை போட்டுள்ளது. இத்திட்டத்திற்காகக் கைப்பற்றப்பட்ட 1700 ஏக்கர் நிலத்தில் சிப்காட் (SIPCOT) தொழிற்பேட்டை அமைப்பதற்கான பேச்சுவார்த்தைகள் நடந்து வருவதாகவும், அதேவேளையில் பரந்தூர் திட்டத்தில் இறுதி முடிவு எதுவும் எடுக்காமல் அப்படியே கிடப்பில் போடப்பட்டுள்ளதாகவும் தகவல்கள் வெளியாகியுள்ளன. இந்த ஒரு முடிவு, வெறும் விமான நிலையத்தோடு நின்றுவிடாமல், அதனைச் சுற்றி திட்டமிடப்பட்டிருந்த சுமார் 50,000 கோடி ரூபாய்க்கும் அதிகமான மெகா உள்கட்டமைப்புத் திட்டங்களையும், 1 லட்சத்திற்கும் மேற்பட்ட வேலைவாய்ப்புகளையும் ஒட்டுமொத்தமாகப் பாதிக்கும் சூழலை உருவாக்கியுள்ளது.

தமிழ்நாட்டின் வான்வழிப் போக்குவரத்தை உலகத் தரத்திற்கு உயர்த்தும் நோக்கில், சுமார் 32,700 கோடி ரூபாய் முதலீட்டில் இந்த பரந்தூர் பசுமை விமான நிலையம் திட்டமிடப்பட்டது. ஆண்டுக்குச் சுமார் 10 கோடி பயணிகளைக் கையாளுவது, இரண்டு அதிநவீன ஓடுதளங்கள் (Runways), பிரம்மாண்டமான சரக்கு போக்குவரத்து மையம் (Cargo Hub) மற்றும் பன்னாட்டு வர்த்தகங்களை ஈர்க்கும் ஏரோசிட்டி (AeroCity) ஆகியவை இத்திட்டத்தின் முக்கிய அம்சங்களாகும். தற்போது இத்திட்டம் கைவிடப்படும் பட்சத்தில், சர்வதேச முதலீட்டாளர்களின் நம்பிக்கையைத் தமிழகம் இழக்க நேரிடும் என்றும், உலகளாவிய விநியோகச் சங்கிலி (Supply Chain) உள்கட்டமைப்புகள் அண்டை மாநிலங்களுக்கு இடம் பெயரும் அபாயம் ஏற்பட்டுள்ளதாகவும் பொருளாதார வல்லுநர்கள் எச்சரிக்கின்றனர்.

பரந்தூர் விமான நிலையத் திட்டத்தால் சென்னை நகரின் போக்குவரத்து முகவரியே மாறவிருந்தது. குறிப்பாக, பூந்தமல்லி, ஸ்ரீபெரும்புதூர், சுங்குவார்சத்திரம் ஆகிய முக்கியத் தொழில்துறை பகுதிகளைப் பரந்தூர் விமான நிலையத்துடன் இணைக்கும் வகையில் 15,906 கோடி ரூபாய் மதிப்பில் 53 கிலோமீட்டர் நீளத்திற்கு அதிவேக மெட்ரோ ரயில் காரிடார் திட்டமிடப்பட்டிருந்தது. சுமார் 20 மெட்ரோ ரயில் நிலையங்களுடன் அமையவிருந்த இந்த வழித்தடத்தின் ஆரம்பகட்டப் பணிகளுக்காக 2,126 கோடி ரூபாய் ஏற்கனவே முந்தைய அரசால் அங்கீகரிக்கப்பட்டு ஒதுக்கப்பட்டிருந்தது. தற்போது விமான நிலையத் திட்டம் முடங்கியுள்ளதால், சென்னை மாநகரையும் அதன் மேற்குத் தொழில் மண்டலங்களையும் இணைக்கவிருந்த இந்த அதிவேக மெட்ரோ கனவுத் திட்டமும் முழுமையாகக் கைவிடப்படும் நிலைக்குத் தள்ளப்பட்டுள்ளது.

போக்குவரத்து இணைப்பைப் பொறுத்தவரை, சென்னை – பெங்களூரு விரைவுச்சாலையுடன் (Chennai-Bengaluru Expressway) பரந்தூர் நேரடியாக இணைக்கப்படவிருந்தது. இதுமட்டுமன்றி, சென்னை மற்றும் பெங்களூரு நகரங்களுக்கு இடையே திட்டமிடப்பட்டுள்ள அதிவேக ரயில் காரிடாரில் (HSR Corridor) பரந்தூர் ஒரு முக்கிய நிறுத்தமாக அமையவிருந்தது. மேலும், விமான நிலையப் போக்குவரத்தை எளிதாக்க பல்லூர் முதல் சோகண்டி வரையிலான (SH-58) பகுதியை 4 வழிச்சாலையாக விரிவுபடுத்தவும், ஒரகடம் தொழில்துறை காரிடாரை இணைக்கும் வகையில் சிங்கபெருமாள் கோவில் முதல் பரந்தூர் வரை சென்னை பெரிபரெல் ரிங் ரோடு (CPRR) வழியாக 30.7 கிலோமீட்டர் நீள புதிய சாலை வழித்தடமும் வடிவமைக்கப்பட்டிருந்தது. இந்த இணைப்புகள் அனைத்தும் தற்போது கேள்விக்குறியாகியுள்ளன.

ஸ்ரீபெரும்புதூர், ஒரகடம் மற்றும் சிப்காட் தொழிற்பேட்டைகளை உள்ளடக்கிய தமிழகத்தின் மிகப்பெரிய உற்பத்தி மற்றும் எலக்ட்ரானிக்ஸ் பகுதியை, பரந்தூர் விமான நிலைய உள்கட்டமைப்புடன் ஒருங்கிணைக்க திட்டமிடப்பட்டிருந்தது. இதன் மூலம் கிடங்குகள் (Warehousing), மின்னணு சாதனத் தயாரிப்பு (Electronics Manufacturing), விண்வெளி உள்கட்டமைப்பு (Aerospace Logistics) மற்றும் ரியல் எஸ்டேட் துறையில் பல்லாயிரக்கணக்கான கோடி முதலீடுகளும், லட்சக்கணக்கான வேலைவாய்ப்புகளும் உருவாகும் என எதிர்பார்க்கப்பட்டது. ஆனால், இந்த உள்கட்டமைப்புச் சங்கிலி உடைந்தால், சென்னைக்கு மேற்கே அமையவிருந்த இந்தியாவின் அடுத்த மாபெரும் பொருளாதாரக் காரிடார் (Economic Corridor) தொடக்கத்திலேயே முடங்கிப்போகும் அச்சம் முதலீட்டாளர்கள் மத்தியிலும், பொதுமக்கள் மத்தியிலும் எழுந்துள்ளது.