ரூ.44,084 கோடி Vs ரூ.4.96 லட்சம் கோடி… அன்று ரூ.5.70 லட்சம் கோடிக்கு கூச்சலிட்ட திமுக.. இன்று ரூ.10 லட்சம் கோடி கடனைக் குவித்தது ஏன்..? சிக்கலில் மாட்டிய ஸ்டாலின்..!!

தமிழ்நாட்டின் கடன் சுமை குறித்த வெள்ளை அறிக்கையை மாநில நிதியமைச்சர் மரிய வில்சன் வெளியிட்டதைத் தொடர்ந்து, கடந்த 2021-ஆம் ஆண்டு திமுக தலைவர் மு.க.ஸ்டாலின் வெளியிட்ட பழைய அறிக்கை தற்போது இணையத்தில் வைரலாகி வருகிறது. தற்போதைய வெள்ளை அறிக்கையின்படி, தமிழ்நாட்டின் மொத்த கடன் சுமை ₹10 லட்சம் கோடியைக் கடந்துள்ளதோடு, பொதுத்துறை நிறுவனங்களின் கடன்களையும் சேர்த்தால் அது ₹13.18 லட்சம் கோடியைத் தாண்டும் எனக் குறிப்பிடப்பட்டுள்ளது. இதன் காரணமாக, மாநிலத்தில் பிறக்கும் ஒவ்வொரு குழந்தையின் மீதும் தற்போது சுமார் ₹1.29 லட்சம் கடன் சுமை இருப்பதாகத் தெரிவிக்கப்பட்டுள்ளதால் பெரும் அரசியல் விவாதம் எழுந்துள்ளது.

இந்தச் சூழலில், கடந்த 2021-ஆம் ஆண்டு அதிமுக ஆட்சியின் இடைக்கால பட்ஜெட்டின் போது மு.க.ஸ்டாலின் வெளியிட்ட அறிக்கை வைரலாகி நெட்டிசன்களிடையே கேள்விகளை எழுப்பியுள்ளது. அன்று அவர் வெளியிட்ட அறிக்கையில், அதிமுக அரசு 10 ஆண்டு காலத்தில் தமிழக மக்கள் தலையில் ₹5.70 லட்சம் கோடி கடனைச் சுமத்திவிட்டுச் செல்வதாகவும், அமைச்சர்கள் “கமிஷன், கரப்ஷன், கலெக்ஷன்” என வாரிச் சுருட்டியதாகவும் ஆவேசமாகக் குற்றம் சாட்டியிருந்தார். மேலும், 2006-11 திமுக ஆட்சிக்காலத்தில் வாங்கப்பட்ட கடன் வெறும் ₹44,084 கோடி மட்டுமே என்றும் அவர் சுட்டிக்காட்டியிருந்தார்.

தற்போது வெளியாகியுள்ள வெள்ளை அறிக்கையின்படி, கடந்த 5 ஆண்டுகளில் மட்டும் கூடுதலாக ₹4.96 லட்சம் கோடி கடன் வாங்கப்பட்டு, மொத்த கடன் ₹10 லட்சம் கோடியைத் தாண்டியுள்ளது தெரியவந்துள்ளது. இதனைச் சுட்டிக்காட்டும் நெட்டிசன்கள் மற்றும் தவெக போன்ற எதிர்க்கட்சியினர், “அதிமுகவின் 10 ஆண்டு கால கடனை விமர்சித்த திமுக, வெறும் 5 ஆண்டுகளில் ₹4.96 லட்சம் கோடி கூடுதல் கடனை ஏற்றியது ஏன்?” என்றும், “திமுக ஆட்சியில் மூலதனச் செலவை விட வட்டிக்குத்தான் அதிகம் செலவாகிறது” என்றும் சரமாரியாகக் கேள்விகளை எழுப்பி விமர்சித்து வருகின்றனர்.