இளையராஜாவ நான் நல்லாப் பாத்துக்கணும்னு ஆசைப்பட்டேன்… ஆனா சண்டை.. இப்போ அவன்தான் பாத்துக்குறான் – மிஷ்கின் எமோஷனல்!

சினிமாவில் தன்னுடைய 50 ஆவது ஆண்டை  விரைவில் தொடப் போகிறார் இசைஞானி இளையராஜா. தமிழ் சினிமாவின் தனிப்பெரும் சாதனையாளர்களில் ஒருவர் இளையராஜா. உலகளவில் அவர் அளவுக்கு அதிக படங்களில் இசையமைத்த இசையமைப்பாளர் இல்லை. இப்போதும் தன்னுடைய 82 ஆவது  வயதில் பிஸியாக பல படங்களுக்கு இசையமைத்து வருகிறார். இதுவரை அவர் 1500 படங்களுக்கு இசையமைத்துள்ளதாக சொல்லப்படுகிறது.

தமிழ் சினிமாவில் பல ஜாம்பவான் இசையமைப்பாளர்கள் உருவாகியுள்ளார்கள். ஆனால் அவர்களுக்கும் இளையராஜாவுக்கும் இடையே உள்ள பெரிய வித்தியாசமே பின்னணி இசையில் இளையராஜாவுக்கு நிகர் அவர் மட்டுமே. இளையராஜா 76 ஆம் ஆண்டு அன்னக்கிளி திரைப்படம் மூலம் அறிமுகமான நிலையில் ஐந்தே ஆண்டுகளில் தமிழ் சினிமாவில் நம்பர் 1 இசையமைப்பாளராக ஆனார்.

அதன் பிறகு மிடாஸ் மன்னன் போல அவர் தொட்டதெல்லாம் தங்கமாக மாறின. அந்தளவுக்கு அவர் பாடல்கள் அடுத்த சில தசாப்தங்களுக்கு தமிழர்களை மயக்கியது. அதன் பின்னர் 1992 ஆம் ஆண்டு ரஹ்மானின் வருகைதான் அதன் பிறகு தமிழ் சினிமா இசையின் போக்கை மாற்றியது. அதன் பின்னர் திறமையான இயக்குனர்கள் இளையராஜாவை தேடி செல்லவில்லை. ஆனால் மறுபடியும் அந்த ட்ரண்ட்டை  மீண்டும் தொடங்கியவர் இயக்குனர் மிஷ்கின்தான்.

அவரதான் கடந்த 10 ஆண்டுகளாக இளையராஜாவை தன்னுடைய படங்களிலும் பேட்டிகளிலும் கொண்டாடினார். அவரின் தனித்தன்மையை ஏறும் மேடைகளில் எல்லாம் இளையராஜா புகழ் பாடினார். ஆனால் அவர்கள் இருவருக்குமே சண்டை வந்து பிரிந்தனர். இப்போது மிஷ்கின் படங்களில் இளையராஜா பணியாற்றுவதில்லை.

இந்நிலையில் சமீபத்தில் அளித்த ஒரு நேர்காணலில் அவர் இதுபற்றி பேசியுள்ளார். அதில் “நான் இளையராஜாவை நல்லாப் பாத்துக்கணும்னு ஆசைப்பட்டேன். ஆனா சண்டை போட்டு வெளியே வந்துட்டேன். இப்போ தியாகராஜன் குமாரராஜா அவரை நல்லா பாத்துக்குறான். அதுக்காக நான் அவனுக்கு நன்றி சொன்னேன்” எனப் பேசியுள்ளார். தியாகராஜன் குமாரராஜா இயக்கிய ‘நினைவோ ஒரு பறவை’ படத்துக்கு இளையராஜா அற்புதமான பாடல்களைக் கொடுத்திருந்தார் என்பது குறிப்பிடத்தக்கது.