“கோவில்களில் இனி ஆட்டம் செல்லாது”.. முதலமைச்சர் விஜய் போட்ட ஆர்டர்.. களத்தில் இறங்கி அதிரடி காட்டும் அமைச்சர் ரமேஷ்..!!

திருச்செந்தூர் சுப்பிரமணியசுவாமி திருக்கோயிலில் முறைகேடுகளில் ஈடுபட்ட மூன்று பணியாளர்களை இந்து சமய அறநிலையத்துறை அமைச்சர் ரமேஷ் அதிரடியாகப் பணிநீக்கம் செய்த சம்பவம் தமிழகம் முழுவதும் பெரும் பரபரப்பை ஏற்படுத்தியுள்ளது. கோயில்களில் இனி எவ்வித முறைகேடுகளும் நடக்கக் கூடாது என்று தமிழக முதல்வர் விஜய் போட்ட உத்தரவின் அடிப்படையில் இந்த அதிரடி நடவடிக்கைகள் எடுக்கப்பட்டு வருகின்றன. இதன் எதிரொலியாக, கோயம்புத்தூர் மாவட்டத்தின் அனைத்து முக்கிய திருக்கோயில்களிலும் கடும் எச்சரிக்கை நிலை ஏற்பட்டுள்ளதுடன், சென்னை தலைமையகத்திலிருந்து கோயில் அதிகாரிகள் மற்றும் பணியாளர்களுக்கு வாய்மொழியாக மிகக் கடுமையான உத்தரவுகளும் பிறப்பிக்கப்பட்டுள்ளன.

கோவை மாவட்டம் தமிழகத்தின் முக்கிய ஆன்மீகச் சுற்றுலாத் தலங்களில் ஒன்றாக விளங்குவதால், அங்குள்ள மருதமலை சுப்பிரமணியசுவாமி கோயில், காரமடை ரங்கநாதசுவாமி கோயில், மேட்டுப்பாளையம் வனபத்ரகாளியம்மன் கோயில், பூண்டி வெள்ளியங்கிரி ஆண்டவர் கோயில், பேரூர் பட்டீஸ்வரர் கோயில் உள்ளிட்ட பல திருத்தலங்களில் எப்போதும் உள்ளூர் மற்றும் வெளிமாநில பக்தர்களின் கூட்டம் அலைமோதுகிறது. இந்தச் சூழலில், சாமி தரிசனத்தை எளிதாக்கித் தருவதாகக் கூறி பொது தரிசன வழியை முடக்கிவிட்டு, பக்தர்களிடம் பெருந்தொகை வசூலித்து ஏமாற்றும் இடைத்தரகர்கள் மற்றும் சில உள்ளூர் நபர்களின் சுரண்டல் முறைகள் குறித்துத் தொடர் புகார்கள் எழுந்து வந்தன. இத்தகைய முறைகேடுகளுக்கு முற்றிலும் முற்றுப்புள்ளி வைக்கத் தமிழக அரசு தற்போது தீவிரமாக உறுதியேற்றுள்ளது.

திருச்செந்தூர் சம்பவத்தைத் தொடர்ந்து, இந்து சமய அறநிலையத்துறை உயர் அதிகாரிகள் கோயம்புத்தூர் உள்ளிட்ட மாவட்டங்களில் உள்ள முக்கிய கோயில்களின் செயல் அலுவலர்கள் மற்றும் பணியாளர்களை நேரடியாகத் தொலைபேசி மூலம் தொடர்பு கொண்டு கறாரான அறிவுறுத்தல்களை வழங்கி வருகின்றனர். பக்தர்களிடம் கனிவான முறையில் நடந்துகொள்ள வேண்டும் என்றும், தரிசனக் கட்டணத்தைத் தாண்டி எந்தவித முறைகேடான பணப் பரிவர்த்தனையையும் அனுமதிக்கக் கூடாது என்றும் உத்தரவிடப்பட்டுள்ளது. மேலும், இடைத்தரகர்களின் நடமாட்டத்தை முற்றிலும் ஒழிக்க வேண்டும் என்றும், ஏதேனும் தவறு கண்டறியப்பட்டால் திருச்செந்தூரைப் போல உடனடி சஸ்பெண்ட் அல்லது பணிநீக்க நடவடிக்கை பாயும் என்றும் எச்சரிக்கை விடுக்கப்பட்டுள்ளதால் கோயில் வட்டாரங்களில் பரபரப்பு நிலவுகிறது.

பக்தர்களிடையே விழிப்புணர்வை ஏற்படுத்தும் வகையில், பேரூர் பட்டீஸ்வரர், மருதமலை, காரமடை ரங்கநாதசுவாமி உள்ளிட்ட முக்கிய கோயில்களின் நுழைவாயில்களில் “இடைத்தரகர்களை நம்பி ஏமாற வேண்டாம்; புகார்கள் இருந்தால் உடனடியாக கோயில் நிர்வாகத்திடம் தெரிவிக்கவும்” என்ற பெரிய அளவிலான அறிவிப்புப் பலகைகள் வைக்கப்பட்டுள்ளன. தமிழகத்தின் அனைத்து திருக்கோயில்களிலும் சீரான நிர்வாகத்தையும், பக்தர்களின் நம்பிக்கையையும் உறுதிப்படுத்தும் வகையில் அமைச்சர் ரமேஷ் எடுத்து வரும் இந்த அதிரடி நடவடிக்கைகள் பொதுமக்கள் மற்றும் ஆன்மீக அன்பர்களிடையே பெரும் வரவேற்பைப் பெற்றுள்ளன.