“அப்பா பேச்சை மகன் கேட்கல”…. நீதிபதி கேட்ட ஒற்றை கேள்வி… துக்கம் தொண்டை அடைக்க ராமதாஸ் சொன்ன அந்த ஒரு பதில்….!

பாமகவின் தலைவராக அன்புமணி ராமதாஸை அங்கீகரித்த தேர்தல் ஆணையத்தின் முடிவை ரத்து செய்யக் கோரியும், மாம்பழச் சின்னத்தை முடக்கக் கோரியும் அக்கட்சியின் நிறுவனர் டாக்டர் ராமதாஸ் சென்னை உயர் நீதிமன்றத்தில் மனுத் தாக்கல் செய்திருந்தார். இந்த மனுவில், அன்புமணியின் பதவிக்காலம் முடிந்துவிட்டதாகவும், போலியான ஆவணங்களைச் சமர்ப்பித்து அவர் பதவியில் நீடிப்பதாகவும் ராமதாஸ் தரப்பில் குற்றம் சாட்டப்பட்டது. மேலும், கட்சி விவகாரங்களில் தீர்வு எட்டப்படும் வரை தமிழகத் தேர்தல் அறிவிப்பைத் தள்ளி வைக்க வேண்டும் என்றும் கோரிக்கை விடுக்கப்பட்டது.

இந்த வழக்கினை விசாரித்த தலைமை நீதிபதி எம்.எம்.ஸ்ரீவஸ்தவா மற்றும் நீதிபதி ஜி.அருள்முருகன் ஆகியோர் அடங்கிய அமர்வு, தந்தைக்கும் மகனுக்கும் இடையிலான இந்த மோதலைக் கண்டு வியப்பு தெரிவித்தது. விசாரணையின் போது, “தந்தை சொல்லை மகன் கேட்பதில்லையா?” என்று நீதிபதிகள் கேள்வி எழுப்பினர். அதற்கு ராமதாஸ் தரப்பு வழக்கறிஞர், “தந்தை சொல்வதை மகன் கேட்பதில்லை” என்று பதிலளித்ததோடு, 35 வயதிலேயே அன்புமணிக்கு அமைச்சர் பதவி வாங்கிக் கொடுத்த தந்தையிடமிருந்து கட்சியை அவர் அபகரித்துக் கொண்டதாக வாதிட்டார்.

மறுபுறம், அன்புமணி தரப்பு வழக்கறிஞர் இந்த வாதங்களை மறுத்ததுடன், ராமதாஸ் தரப்பில் தாக்கல் செய்யப்பட்டுள்ள ஆவணங்களில் உள்ள கையெழுத்துகளே சந்தேகத்திற்குரியதாக இருப்பதாகத் தெரிவித்தார். தேர்தல் ஆணையம் தரப்பில் ஆஜரான வழக்கறிஞர், உட்கட்சி விவகாரங்களில் ஆணையம் தலையிட முடியாது என்றும், இது தொடர்பாக உரிமையியல் நீதிமன்றத்தை நாடுமாறு டெல்லி உயர் நீதிமன்றம் ஏற்கனவே அறிவுறுத்தியுள்ளதையும் சுட்டிக்காட்டினார். இரு தரப்பு வாதங்களையும் கேட்ட நீதிபதிகள், நீதிமன்றத்தின் நேரத்தை வீணடிப்பதாக அதிருப்தி தெரிவித்தனர்.

இறுதியாக, இந்த விவகாரம் தொடர்பாக ஏற்கனவே சென்னை உரிமையியல் நீதிமன்றத்தில் வழக்கு நிலுவையில் இருப்பதைச் சுட்டிக்காட்டிய உயர் நீதிமன்றம், அங்கேயே தீர்வைத் தேடிக் கொள்ளுமாறு அறிவுறுத்தியது. ஒரே விவகாரத்திற்காகப் பல நீதிமன்றங்களை நாடுவதைக் கண்டித்த நீதிபதிகள், ராமதாஸ் தாக்கல் செய்த இரு மனுக்களையும் தள்ளுபடி செய்து அதிரடி உத்தரவிட்டனர். இந்தத் தீர்ப்பு பாமகவின் உட்கட்சிப் பூசலில் ஒரு முக்கியத் திருப்பமாகப் பார்க்கப்படுகிறது.