“ஸ்டாலின் கொடுக்காத வாய்ப்பு.. எடப்பாடி கொடுத்த ‘ஆஃபர்'”… மதுரையில் திமுகவின் ஓட்டு வங்கியை காலி செய்யப்போகும் மன்னன்-கோபி கூட்டணி….!

மதுரை மாநகராட்சியின் முன்னாள் துணை மேயரும், முன்னாள் மத்திய அமைச்சர் மு.க. அழகிரியின் தீவிர ஆதரவாளருமான மன்னன், சமீபத்தில் எடப்பாடி பழனிசாமி முன்னிலையில் அதிமுகவில் இணைந்தார். நீண்ட காலமாக திமுகவில் மீண்டும் இணைய முயன்றும் அதற்கு வாய்ப்பு கிடைக்காத சூழலில், தனது ஆதரவாளர் எஸ்ஸார் கோபியுடன் அவர் அதிமுகவில் ஐக்கியமாகியுள்ளார். இவர்களின் வருகை மதுரையில் அதிமுகவிற்கு கூடுதல் பலத்தை அளித்துள்ளதாக அக்கட்சியினர் உற்சாகமடைந்துள்ளனர்.

வருகின்ற சட்டமன்றத் தேர்தலில் மதுரை கிழக்கு தொகுதியில் அமைச்சர் மூர்த்திக்கு எதிராகப் போட்டியிட மன்னனைத் தயார் செய்யும் பணிகளில் அதிமுக தலைமை ஈடுபட்டுள்ளது. கடந்த 2021 தேர்தலில் 50,000 வாக்குகள் வித்தியாசத்தில் வெற்றி பெற்ற அமைச்சர் மூர்த்தி, அந்தத் தொகுதியில் மிகவும் வலுவாக உள்ளார். அவருக்குச் சவால் அளிக்கும் வகையில், தேர்தல் பணிகளில் கைதேர்ந்தவரான மன்னனை களமிறக்க முன்னாள் அமைச்சர் செல்லூர் ராஜு வியூகம் வகுத்துள்ளதாகக் கூறப்படுகிறது.

மு.க. அழகிரியின் நம்பிக்கைக்குரியவராக இருந்து ‘திருமங்கலம் ஃபார்முலா’ உள்ளிட்ட பல தேர்தல் களங்களில் பணியாற்றிய அனுபவம் மன்னனுக்கு உண்டு. குறிப்பாக, முக்குலத்தோர் சமூக வாக்குகளை அதிமுக பக்கம் திருப்புவதில் மன்னன் மற்றும் எஸ்ஸார் கோபி ஆகியோரின் பங்களிப்பு முக்கியமாக இருக்கும் என எதிர்பார்க்கப்படுகிறது. இவர்களுக்குப் போட்டியிட வாய்ப்பு அளிப்பதாகக் கூறித்தான் அதிமுக தலைமை இவர்களைக் கட்சிக்குள் ஈர்த்துள்ளதாக அரசியல் வட்டாரங்கள் தெரிவிக்கின்றன.

இருப்பினும், அமைச்சர் மூர்த்தி தனது தொகுதியில் பல்வேறு நலத்திட்டங்களைச் செயல்படுத்தி மக்கள் செல்வாக்குடன் திகழ்வதால், மன்னனின் வருகை எந்த அளவிற்கு அதிமுகவிற்கு வெற்றியைத் தேடித்தரும் என்பது விவாதத்திற்குரிய ஒன்றாக உள்ளது. தென் தமிழக அரசியலில் முக்கியத் திருப்பமாகப் பார்க்கப்படும் இந்த நகர்வு, வரும் தேர்தலில் மதுரை கிழக்கு தொகுதியில் ஒரு நட்சத்திரப் போட்டியை உருவாக்கும் என்பதில் ஐயமில்லை.