“ஒரே அசிங்கமா போச்சி குமாரு”… கவரிங் கடையை கபளீகரம் செய்த பெண் தாதா… சிசிடிவியில் சிக்கிய திமுக புள்ளி….!

கன்னியாகுமரி மாவட்டம் குளச்சல் பகுதியில் உள்ள ஒரு கவரிங் நகைக்கடையில் நூதன முறையில் நகை திருடிய வழக்கில், புத்தளம் பேரூராட்சி திமுக துணைத் தலைவி உட்பட நான்கு பேர் கைது செய்யப்பட்டுள்ள சம்பவம் பெரும் பரபரப்பை ஏற்படுத்தியுள்ளது. குளச்சல் பேருந்து நிலைய வணிக வளாகத்தில் ஷார்லின் சேம் என்பவர் நடத்தி வரும் கவரிங் நகைக்கடையில் இந்த துணிகரத் திருட்டு அரங்கேறியுள்ளது.

சம்பவத்தன்று, கடையின் பெண் ஊழியர் மட்டும் தனியாக இருந்த நேரத்தில், ஒரு ஆண் மற்றும் நான்கு பெண்கள் என ஐந்து பேர் கொண்ட கும்பல் நகை வாங்குவது போல் கடைக்குள் நுழைந்துள்ளனர். ஊழியரின் கவனத்தை திசைதிருப்பிய அவர்கள், கண்ணிமைக்கும் நேரத்தில் ஒரு லட்சம் ரூபாய் மதிப்பிலான தங்க முலாம் பூசப்பட்ட காப்புகள், தாலிச் சங்கிலிகள் மற்றும் ஐம்பொன் நகைகளைத் திருடித் தங்களது பையில் மறைத்து வைத்துக்கொண்டு அங்கிருந்து தப்பிச் சென்றுள்ளனர்.

நகைகள் மாயமானதை உணர்ந்த ஊழியர் அளித்த புகாரின் பேரில், குளச்சல் போலீசார் சிசிடிவி காட்சிகளை ஆய்வு செய்தனர். அந்த சோதனையில், திருட்டில் ஈடுபட்டது புத்தளம் பேரூராட்சி தி.மு.க துணைத் தலைவி பால்தங்கம் என்பது உறுதி செய்யப்பட்டது. இதனைத் தொடர்ந்து பால்தங்கம், அவரது மகள் சபரிஷா, கார் ஓட்டுநர் அனிஷ் மற்றும் உறவினர் தங்க புஷ்பம் ஆகிய நான்கு பேரை போலீசார் கைது செய்து, அவர்களிடமிருந்து திருடப்பட்ட நகைகளையும் மீட்டனர்.

கைது செய்யப்பட்ட தி.மு.க பிரமுகர் பால்தங்கம் மீது ஏற்கனவே கொலை முயற்சி உள்ளிட்ட மூன்று வழக்குகள் நிலுவையில் இருப்பதாகக் கூறப்படுகிறது. மக்கள் பிரதிநிதியாக இருக்கும் ஒருவரே தனது குடும்பத்துடன் சேர்ந்து கடையின் கவனத்தை திசைதிருப்பி நகைத் திருட்டில் ஈடுபட்ட காட்சிகள் சமூக வலைதளங்களில் வெளியாகி பொதுமக்களிடையே பெரும் அதிர்ச்சியையும் கண்டனங்களையும் எழுப்பியுள்ளது. தலைமறைவாக உள்ள மற்றொரு பெண்ணை போலீசார் தீவிரமாகத் தேடி வருகின்றனர்.