“இன்னும் 60 நாள் தான் டைம்.. அதுக்குள்ள கிளம்புங்க”… அமெரிக்காவில் இந்தியர்களுக்கு வந்த சோதனை… டிரம்ப் அரசின் திடீர் உத்தரவால் ஐடி ஊழியர்கள் அதிர்ச்சி…!

அமெரிக்காவில் பல ஆண்டுகளாகவே இந்தியத் தொழில்நுட்ப ஊழியர்களுக்கு எச்-1பி (H-1B) விசா என்பது ஒரு வாழ்நாள் கனவாகவும், அங்கு செட்டில் ஆவதற்கான நுழைவுச் சீட்டாகவும் இருந்து வருகிறது. ஆனால், சமீபத்திய மாதங்களாக மெட்டா, அமேசான், ஆரக்கிள் போன்ற முன்னணி நிறுவனங்கள் மேற்கொண்டு வரும் தொடர் பணிநீக்கங்கள், அங்குள்ள இந்திய ஐடி ஊழியர்களின் வாழ்க்கையைத் தலைகீழாக மாற்றியுள்ளது. 2026ஆம் ஆண்டு வரை மட்டுமே சுமார் 144 தொழில்நுட்ப நிறுவனங்களில் 110,000க்கும் அதிகமான ஊழியர்கள் வேலை இழந்துள்ளதாகத் தரவுகள் கூறுகின்றன. இதில் கவலையளிக்கும் விஷயம் என்னவென்றால், இந்த வேலை இழப்பால் பாதிக்கப்பட்டவர்களில் பெரும்பாலானோர் இந்தியாவைச் சேர்ந்த எச்-1பி விசா வைத்திருப்பவர்கள் என்பதுதான்.

விதிமுறைகளின்படி, எச்-1பி விசா ஊழியர்கள் தங்கள் வேலையை இழந்தால், அடுத்த 60 நாட்களுக்குள் (Grace Period) மற்றொரு புதிய வேலையைக் கண்டறிய வேண்டும். அவ்வாறு வேலை கிடைக்காத பட்சத்தில் அவர்கள் சட்டப்பூர்வமாக அமெரிக்காவை விட்டு வெளியேற வேண்டிய கட்டாயம் ஏற்படுகிறது. இந்த இக்கட்டான 2 மாத காலக்கெடுவை எதிர்கொள்ள முடியாமல், பல இந்திய ஊழியர்கள் தற்காலிகமாக ஆறு மாதங்கள் தங்க அனுமதிக்கும் பி-2 (B-2 Visitor Visa) விசிட்டர் விசாவிற்கு மாற முயல்கிறார்கள். இருப்பினும், டிரம்ப் தலைமையிலான தற்போதைய அரசு குடிவரவு சட்டங்களைக் கடுமையாக்கியுள்ளதால், இந்த பி-2 விசா மாற்றத்திற்கான ஒப்புதலைப் பெறுவது முன்னெப்போதையும் விட இப்போது பெரும் சவாலாக மாறியுள்ளது.

குடிவரவு அதிகாரிகள் தற்போது விசா மாற்றக் கோரும் ஊழியர்களிடம் கூடுதல் ஆவணங்களைக் கேட்பதுடன், விசா மறுப்புகளின் எண்ணிக்கையையும் கணிசமாக அதிகரித்துள்ளனர். இது குறித்துப் பிரபல அமெரிக்க குடிவரவு வழக்கறிஞர் ராஜீவ் கன்னா குறிப்பிடுகையில், வேலை இழந்த ஊழியர்களின் பி-1/பி-2 விசா விண்ணப்பங்கள் நிராகரிக்கப்படுவது இப்போது பெருமளவில் அதிகரித்துள்ளதாக உறுதிப்படுத்தியுள்ளார். பல ஆண்டுகளாக அமெரிக்காவில் உழைத்து, தங்கள் வீடு, குழந்தைகளின் கல்வி என அங்கேயே வாழ்க்கையைக் கட்டமைத்த இந்தியர்களுக்கு, இந்த விசா கெடுபிடிகள் மற்றும் கிரீன் கார்டுக்கான (Green Card) நீண்ட காத்திருப்பு காலம் ஆகியவை இரட்டிப்பு மன அழுத்தத்தை ஏற்படுத்தியுள்ளன.

இந்த இடியாப்பச் சிக்கலில் இருந்து தப்பிக்க, இந்திய ஊழியர்கள் தற்போது மாற்று வழிகளைத் தீவிரமாக ஆராய்ந்து வருகின்றனர். சிலர் தங்களின் தங்கும் உரிமையைத் தக்கவைக்க எஃப்-1 (F-1) மாணவர் விசா, ஓ-1 (O-1) விசா அல்லது எல்-1 (L-1) விசா போன்ற பிற வாய்ப்புகளைப் பரிசீலிக்கிறார்கள். அதே நேரத்தில், அமெரிக்காவின் இந்த இறுக்கமான சூழலுக்குப் பயந்து, பல திறமைசாலிகள் கனடாவின் ‘எக்ஸ்பிரஸ் என்ட்ரி’ (Express Entry) மற்றும் ‘குளோபல் டேலன்ட் ஸ்ட்ரீம்’ (Global Talent Stream) போன்ற எளிமையான திட்டங்கள் மூலமாக கனடாவிற்கும், ஐரோப்பிய நாடுகளுக்கும் தங்களின் கவனத்தைத் திருப்பத் தொடங்கியுள்ளனர்.