வேகமாக வந்த லாரி… அடுத்தடுத்து மோதி சிதறிய பைக்குகள்.. இன்னும் எத்தனை உயிர்கள் பலியாக வேண்டும்..?

ராணிப்பேட்டை மாவட்டம் காவேரிப்பாக்கம் அருகே நேரிட்ட பயங்கர சாலை விபத்தில் பலியானோரின் எண்ணிக்கை 3 ஆக உயர்ந்துள்ளது அப்பகுதியில் பெரும் சோகத்தை ஏற்படுத்தியுள்ளது. ஆரம்பத்தில் இருவர் சம்பவ இடத்திலேயே உயிரிழந்த நிலையில், படுகாயமடைந்து தீவிர சிகிச்சை பெற்று வந்த மேலும் ஒருவர் சிகிச்சை பலனின்றி பரிதாபமாக உயிரிழந்தார்.

இந்த விபத்தானது காவேரிப்பாக்கம் தேசிய நெடுஞ்சாலையில் அதிவேகமாக வந்த லாரி ஒன்று, எதிர்பாராதவிதமாக இருசக்கர வாகனங்கள் மீது பயங்கரமாக மோதியதால் ஏற்பட்டுள்ளது. விபத்து குறித்து தகவல் அறிந்ததும் சம்பவ இடத்திற்கு விரைந்த காவேரிப்பாக்கம் காவல்துறையினர், உடல்களைக் கைப்பற்றி பிரேதப் பரிசோதனைக்கு அனுப்பியதோடு, விபத்துக்கான காரணம் குறித்து தீவிர விசாரணை நடத்தி வருகின்றனர்.

அடிக்கடி விபத்துகள் அரங்கேறும் இந்த நெடுஞ்சாலைப் பகுதியில் போதிய பாதுகாப்பு வசதிகளோ அல்லது வேகத்தடைகளோ இல்லை எனக்கூறி உள்ளூர் மக்கள் கடும் அதிர்ச்சியும் ஆத்திரமும் அடைந்துள்ளனர். விபத்துகளைத் தடுக்கவும், பொதுமக்களின் பாதுகாப்பை உறுதி செய்யவும் மாவட்ட நிர்வாகமும் காவல்துறையும் உடனடியாக இந்தச் சாலையில் கூடுதல் பாதுகாப்பு நடவடிக்கைகளை மேற்கொள்ள வேண்டும் என்று அப்பகுதி மக்கள் கோரிக்கை விடுத்துள்ளனர்.