இந்துக்கள் வீதிக்கு வாங்க… கடவுளே இல்லன்னு சொல்றவங்க கையில கோவில் பொறுப்பு… பரபரப்பை கிளப்பிய எச்.ராஜா…!

பாஜக மூத்த தலைவர் எச்.ராஜா செய்தியாளர்களை சந்தித்த பொழுது, “இன்று நம் கோவில்கள் நம்மிடம் இல்லை. திமுக அரசின் கட்டுப்பாட்டில் உள்ளது. கடவுள் இல்லை என்று கூறும் திமுகவினர், 40 ஆயிரம் இந்து கோயில்களை தங்கள் கையில் வைத்துள்ளனர். உண்டியல் பணத்தை மட்டுமே அறநிலையத்துறை எடுத்துக்கொள்கிறது. கோவில்களை முறையாக பராமரிக்காமல், மேலும் அதில் பணிபுரியும் பூசாரிகளுக்கு சரியான ஊதியம் கொடுப்பதில்லை. திராவிட மாடல் ஆட்சியில், இந்துக்களுக்கு பாதுகாப்பு இல்லை. திருச்செந்தூர் கோவில் கும்பாபிஷேக பணியில் முறைகேடுகள் நடந்துள்ளது. அங்குள்ள கான்கிரீட் தளங்கள் பல பெயர்ந்துள்ளன. தமிழகத்தில் 9500 கோவில்கள் கணக்கே கொடுக்கவில்லை என நீதிமன்றம் கூறுகிறது. மாடல் அரசு நடத்திய முருக பக்தர்கள் மாநாடு, இந்துக்கள் காணிக்கை பணத்தில் நடத்தப்பட்டது. அதற்கான கணக்கு விவரம் இதுவரை கொடுக்கப்படவில்லை. கணக்கு காட்டாத அறநிலைத்துறைக்கு எதிராக இந்துக்கள் வீதிக்கு வர வேண்டும்” என தெரிவித்துள்ளார்.