“லட்டு மாதிரி சான்ஸ்”…. விஜய்யால் ஸ்டாலினுக்கு அடிக்கப்போகும் ஜாக்பாட்?…. உளவுத்துறை கொடுத்த அந்த ரகசிய ரிப்போர்ட்….!

தமிழகத்தில் 2026 ஆம் ஆண்டு நடைபெறவுள்ள சட்டமன்றத் தேர்தலை முன்னிட்டு, ஆளுங்கட்சியான திமுக தனது தேர்தல் வியூகங்களை இப்போதே வகுக்கத் தொடங்கியுள்ளது. குறிப்பாக, கூட்டணியைச் சார்ந்து இருக்காமல் திமுக தனிப் பெரும்பான்மையுடன் ஆட்சியைப் பிடிக்க முடியுமா என்பது குறித்து முதலமைச்சர் மு.க. ஸ்டாலின் உளவுத்துறையிடம் விரிவான அறிக்கை ஒன்றைக் கேட்டுள்ளதாகத் தகவல்கள் வெளியாகியுள்ளன. இதற்காக ஒரு தனிக்குழு களமிறக்கப்பட்டு, தொகுதி வாரியாக நிலவும் அரசியல் சூழல்கள் குறித்து ஆய்வுகள் மேற்கொள்ளப்பட்டு வருகின்றன.

இந்த ஆய்வில் முக்கியமாக, நடிகர் விஜய்யின் தமிழக வெற்றிக் கழகம் யாருடைய வாக்குகளைப் பிரிக்கும் என்பது குறித்து உளவுத்துறை தீவிரமாகக் கண்காணித்து வருகிறது. தவெக எதிர்க்கட்சியின் வாக்குகளைப் பிரித்தால் அது திமுகவிற்குச் சாதகமாக அமையும் என்றும், ஒருவேளை ஆளுங்கட்சியின் வாக்கு வங்கியில் குறிப்பாகச் சிறுபான்மையினர் மற்றும் ஒடுக்கப்பட்ட மக்களின் வாக்குகளைப் பிரித்தால் அது திமுகவிற்குப் பின்னடைவை ஏற்படுத்தும் என்றும் கருதப்படுகிறது. தவெக அதிக வாக்குகளைப் பெறும் பட்சத்தில், அது தொங்கு சட்டமன்ற நிலையை உருவாக்கிவிடுமோ என்ற அச்சமும் திமுக தரப்பில் நிலவுகிறது.

ஒருவேளை தொங்கு சட்டமன்றம் உருவானால், எம்.எல்.ஏ-க்களைத் தக்க வைப்பது மற்றும் குதிரை பேரங்களைத் தவிர்ப்பது போன்ற சவால்களை திமுக எதிர்கொள்ள வேண்டியிருக்கும். குறிப்பாக, காங்கிரஸ் போன்ற கூட்டணிக் கட்சிகளின் வேட்பாளர்கள் வெற்றி பெற்ற பிறகு பாஜக பக்கம் சாய்ந்துவிடக் கூடாது என்பதில் திமுக கவனமாக உள்ளது. இதற்காக வேட்பாளர் தேர்வின் போதே அவர்கள் எவ்வளவு தூரம் நம்பகமானவர்கள் மற்றும் யாருக்கெல்லாம் பாஜகவுடன் ரகசியத் தொடர்பு இருக்கிறது என்பது குறித்தும் உளவுத்துறை மூலம் ரகசிய விசாரணை நடத்தப்பட்டு வருகிறது.

திமுக இந்த முறை தனது உதயசூரியன் சின்னத்தில் சுமார் 170 தொகுதிகளில் போட்டியிடத் திட்டமிட்டுள்ளது. இதன் மூலம் கூட்டணி கட்சிகளின் தயவின்றி தனித்து ஆட்சி அமைக்கும் பலத்தைப் பெற முடியும் என அக்கட்சி நம்புகிறது. உளவுத்துறையின் இந்த அறிக்கை கிடைத்தவுடன், தேர்தல் களத்தில் எங்கு வாக்குகளைப் பலப்படுத்த வேண்டும் மற்றும் வேட்பாளர் தேர்வில் எடுக்க வேண்டிய மாற்றங்கள் குறித்து முதலமைச்சர் ஸ்டாலின் இறுதிக்கட்ட முடிவை எடுப்பார் என எதிர்பார்க்கப்படுகிறது.