பனையூரில் வெடிக்கப் போகும் வெடிகுண்டு… எம்.எல்.ஏ-க்களை நேரில் அழைத்து விசாரிக்கும் முதல்வர் விஜய்…. பரபரக்கும் தலைமை செயலகம்….!

தமிழக முதல்வரும் தமிழக வெற்றிக் கழகத்தின் தலைவருமான ஜோசப் விஜய், புதன்கிழமை (நவம்பர் 11) தவெக அமைச்சர்கள் மற்றும் சட்டமன்ற உறுப்பினர்களுடன் அவசர ஆலோசனை மேற்கொள்ளவுள்ளார். இதற்காகக் கட்சியின் சட்டமன்ற உறுப்பினர்கள் அனைவரும் உடனடியாகச் சென்னை வர வேண்டும் என்று கட்சித் தலைமை திடீர் உத்தரவு பிறப்பித்துள்ளது. எம்.எல்.ஏ-க்கள் சிலர் தொடர்ச்சியாகச் சர்ச்சைகளில் சிக்கி வருவதும், அதைக் கட்டுப்படுத்துவதுமே இந்தக் கூட்டத்தின் முக்கிய நோக்கமாக இருக்கும் எனக் கூறப்படுகிறது.

சமீபகாலமாக தவெக சட்டமன்ற உறுப்பினர்கள் பொதுவெளியில் கலந்துகொள்ளும் நிகழ்வுகள் மற்றும் அவர்களது செயல்பாடுகள் பெருமளவில் விமர்சனத்துக்கு உள்ளாகி வருகின்றன. தொகுதி மக்களின் அடிப்படைப் பிரச்சினைகள் குறித்துக் கேள்வியெழுப்பிய நபர் ஒருவரை தவெக எம்.எல்.ஏ-வும் துணை சபாநாயகருமான ரவிசங்கர் தாக்கிய விவகாரம் பெரும் கொந்தளிப்பை ஏற்படுத்தியது. அதேபோல, கள்ளக்குறிச்சி மாவட்ட ஆட்சியருக்கு தவெக எம்.எல்.ஏ அருள் விக்னேஷ் ஆபாசக் குறுஞ்செய்தி அனுப்பியதாக வெளியான தகவலும் அரசியல் களத்தில் புயலைக் கிளப்பியுள்ளது.

இவ்வாறான தொடர் குற்றச்சாட்டுகளும் சர்ச்சைகளும் கட்சிக்கு மக்கள் மத்தியில் இருக்கும் நற்பெயரைக் கடுமையாகக் களங்கப்படுத்துவதாகத் தவெக தொண்டர்களே அதிருப்தி தெரிவித்து வருகின்றனர். இந்தச் சம்பவங்கள் கட்சித் தலைமைக்கும் பெரும் சங்கடத்தை உருவாக்கியுள்ளதால், தவெக தலைமை இது தொடர்பாக முதற்கட்ட விசாரணையை தீவிரமாக மேற்கொண்டு வருகிறது. பொதுமக்கள் மற்றும் ஊடகங்கள் மத்தியில் எழுந்துள்ள கேள்விகளுக்குப் பதிலளிக்கும் வகையில் இந்த ஆலோசனை அமைந்திருக்கும் எனத் தெரிகிறது.

வரும் புதன்கிழமை நடைபெறவுள்ள இந்தக் கூட்டத்தில், மக்கள் மத்தியில் கட்சியின் நன்மதிப்பைப் பாதுகாப்பது குறித்தும், தொகுதிகளிலும் பொதுவெளியிலும் எம்.எல்.ஏ-க்கள் எவ்வாறு கண்ணியத்துடன் நடந்து கொள்ள வேண்டும் என்பது குறித்தும் முதல்வர் விஜய் கடுமையான அறிவுறுத்தல்களையும் எச்சரிக்கைகளையும் வழங்க உள்ளதாகக் கூறப்படுகிறது. மேலும், அதிமுகவில் இருந்து விலகி தவெகவில் இணைந்த 4 எம்.எல்.ஏ-க்கள் மீதான தகுதி நீக்கம் தொடர்பான விவகாரத்தில் சபாநாயகர் ஜேசிடி பிரபாகர் நோட்டீஸ் அனுப்பியுள்ள நிலையில், அதுகுறித்த சட்டப்பூர்வ மற்றும் அரசியல் நகர்வுகள் பற்றியும் இக்கூட்டத்தில் விவாதிக்கப்படலாம்.

முதலமைச்சராகப் பொறுப்பேற்ற பிறகு விஜய் அரசுப் பணிகளில் கவனம் செலுத்தி வந்தாலும், பனையூரில் உள்ள கட்சித் தலைமை அலுவலகத்திற்குச் சென்று நீண்ட நாட்களாவதால் கட்சிப் பணிகளில் அவர் ஆர்வம் காட்டவில்லை என்ற விமர்சனங்களும் எழுந்தன. இந்தச் சூழலில், சர்ச்சைகளுக்கு முற்றுப்புள்ளி வைக்கும் வகையிலும் கட்சி நிர்வாகத்தை முடுக்கிவிடும் வகையிலும் தவெக எம்.எல்.ஏ-க்களை அவசரமாகச் சென்னைக்கு அழைத்திருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது.