கொலையா?… மதுவில் விஷமா?… காட்டுப் பகுதியில் ரத்த வெள்ளத்தில்… 2 பேரின் உடல்கள் மீட்பு… பதறவைக்கும் பின்னணி… ராமநாதபுரத்தில் பரபரப்பு…!

ராமநாதபுரம் மாவட்டம் ஏர்வாடி அருகேயுள்ள சின்னமாயாகுளம் காட்டுப் பகுதியில், திருவள்ளுவர் நகரைச் சேர்ந்த கோபி மற்றும் கணேசன் (எ) ரியாசுதீன் ஆகிய இருவர் மூக்கு மற்றும் கண்களில் ரத்தம் வடிந்த நிலையில் சடலமாக மீட்கப்பட்டனர். தகவலறிந்து சம்பவ இடத்திற்கு விரைந்த ஏர்வாடி காவல்துறையினர் மற்றும் மாவட்ட காவல் கண்காணிப்பாளர் சந்தீஷ் ஆகியோர் நேரில் சென்று தீவிர விசாரணை மேற்கொண்டனர்.

சடலங்கள் கண்டெடுக்கப்பட்ட இடத்தின் அருகே காலி மது பாட்டில்கள் மற்றும் தண்ணீர் பாட்டில்கள் சிதறிக் கிடந்தன. இதனால் இருவரும் அளவுக்கு அதிகமாக நச்சுத்தன்மை கொண்ட மதுவைக் குடித்து உயிரிழந்தனரா அல்லது மர்ம நபர்கள் யாரேனும் மதுவில் நஷம் கலந்து கொடுத்துக் கொலை செய்தனரா என்ற பல்வேறு கோணங்களில் காவல்துறையினர் தீவிரமாக விசாரணையைத் தொடங்கியுள்ளனர்.

உயிரிழந்தவர்களின் உடல்கள் உடற்கூறாய்வுக்காக ராமநாதபுரம் அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டுள்ளன. இச்சம்பவம் குறித்து 4 தனிப்படைகள் அமைக்கப்பட்டு விசாரணை நடந்து வருவதாகவும், பிரேதப் பரிசோதனை அறிக்கை வந்த பிறகே உண்மைக்காரணம் தெரியவரும் என்றும் எஸ்பி தெரிவித்துள்ளார். மேலும், முன்னெச்சரிக்கையாக ஏர்வாடி, கீழக்கரை, மாயாகுளம் பகுதிகளில் பலத்த போலீஸ் பாதுகாப்பு போடப்பட்டுள்ளது.