“வானம் இடிந்தது… பூமி பிளந்தது”…. இரவோடு இரவாக 2.3 லட்சம் பேரை சுருட்டிச் சென்ற கொடூர அணை விபத்து… 62 அணைகள் அடுத்தடுத்து நொறுங்கி விழுந்த அந்த நள்ளிரவு பகீர்….!

“வானமே இடிந்து, பூமியே பிளந்தது போல் பயங்கர சத்தம் கேட்டது” – 1975 ஆகஸ்ட் 8 நள்ளிரவில் சீனாவின் பான்கியாவ் அணை உடைந்தபோது, அதை நேரில் பார்த்தவர்கள் விவரித்த வரிகள் இவை. சீனாவின் ஹெனான் மாகாணத்தில் வெள்ளத்தைக் கட்டுப்படுத்தவும், மின்சார உற்பத்தி மற்றும் பாசனத்திற்காகவும் 1950-களில் கட்டப்பட்ட இந்த அணை, சோவியத் பொறியாளர்களின் உதவியுடன் வலுப்படுத்தப்பட்டதால் ‘அழிக்க முடியாத இரும்பு அணை’ என்று பெருமையுடன் அழைக்கப்பட்டது. மாவோ சேதுங்கின் ஆட்சியில் நீரையும் இயற்கையையும் கட்டுப்படுத்தும் நோக்கில் அதிகளவில் தண்ணீரைச் சேமிக்க முன்னுரிமை அளிக்கப்பட்டதே தவிர, எதிர்பாராத பெருவெள்ளத்தின் போது நீரை அவசரமாக வெளியேற்றும் கட்டமைப்புத் திறனில் போதிய கவனம் செலுத்தப்படவில்லை. இதுவே பின்னாளில் வரலாற்றின் மிக மோசமான பேரழிவிற்கு விதையாக அமைந்தது.

1975 ஆகஸ்ட் தொடக்கத்தில் வீசிய ‘நினா’ புயல், ஹெனான் மாகாணத்தில் இதுவரை கண்டிராத பெருமழையைக் கொட்டித் தீர்த்தது. பான்கியாவ் பகுதியில் மட்டும் ஒரே நாளில் 784 மி.மீ மழையும், மூன்று நாட்களில் 1,422 மி.மீ மழையும் பதிவானது. இதனால் அணைக்கு விநாடிக்கு 13,000 கன மீட்டர் நீர் வரத்து இருந்தது; ஆனால், அணையின் மதகுகளால் விநாடிக்கு 1,700 கன மீட்டர் தண்ணீரை மட்டுமே வெளியேற்ற முடிந்தது. இதனிடையே தகவல் தொடர்பு சாதனங்களும் முடங்கியதால், அதிகாரிகளால் மேலிடத்திற்குத் தகவல் தெரிவிக்கவோ, உடனடியாக முடிவெடுக்கவோ முடியாமல் போனது. இதன் விளைவாக, ஆகஸ்ட் 8 அதிகாலையில் அணை சுக்குநூறாக உடைந்து, சுமார் 701 மில்லியன் கன மீட்டர் நீர் மணிக்கு 50 கி.மீ வேகத்தில் பேரலையாகப் பாய்ந்தது.

இந்த அணை உடைந்த வேகத்திலும் அழுத்தத்திலும், அதன் கீழ் பகுதியில் இருந்த ஷிமான்டன் அணை உட்படச் சங்கிலித் தொடராக மொத்தம் 62 அணைகளும் நீர்த்தேக்கங்களும் அடுத்தடுத்து உடைந்து தரைமட்டமாயின. வெள்ளத்தில் சிக்கி நேரடியாகச் சுமார் 26,000 பேர் உயிரிழந்த நிலையில், அதைத் தொடர்ந்து பரவிய பசி, பட்டினி மற்றும் தொற்றுநோய்களால் மேலும் ஒரு லட்சத்திற்கும் அதிகமானோர் மடிந்தனர். மொத்தமாகப் பலியானோரின் எண்ணிக்கை 2.3 லட்சம் வரை இருக்கலாம் என்றும், ஒரு கோடிக்கும் அதிகமான மக்கள் தங்களது வாழ்வாதாரங்களை இழந்து பாதிக்கப்பட்டதாகவும் ஆய்வுகள் கூறுகின்றன.

கம்யூனிஸ்ட் ஆட்சியின் பிம்பத்தைக் காப்பாற்றுவதற்காக, இந்த பேரழிவு தொடர்பான செய்திகளையும் உயிரிழப்பு விவரங்களையும் சீன அரசு பல ஆண்டுகளாக உலகிற்குத் தெரியாமல் ரகசியமாக மூடி மறைத்தது. சமீபத்தில் நேபாளத்தில் ஏற்பட்ட வெள்ளப்பெருக்கு போன்ற சம்பவங்கள், பான்கியாவ் அணை தந்த கசப்பான பாடத்தை மீண்டும் உலகிற்கு நினைவூட்டுகின்றன. இயற்கைச் சீற்றங்களை முழுமையாகத் தடுக்க முடியாவிட்டாலும், சரியான திட்டமிடல் இல்லாமை, மோசமான நிர்வாகம் மற்றும் காலந்தாழ்ந்த எச்சரிக்கைகள் ஒரு இயற்கைச் அசம்பாவிதத்தை எத்தகைய கொடூரமான மனிதப் பேரழிவாக மாற்றக்கூடும் என்பதற்குப் பான்கியாவ் சம்பவமே மிகப்பெரிய சான்றாகும்.