பெங்களூரில் பயங்கரம்: முதல் திருமணத்தை மறைத்து.. 2வது மனைவியைக் கத்தியால் குத்திக் கொன்ற ஆட்டோ டிரைவர்… நெஞ்சை உலுக்கும் பின்னணி…!

பெங்களூரு மகதி பகுதியைச் சேர்ந்த 22 வயது இளம்பெண் பவானி, அங்குள்ள செல்போன் கடையில் பணிபுரிந்து வந்தபோது ஆட்டோ ஓட்டுநரான சந்திரசேகர் (33) என்பவருடன் காதல் ஏற்பட்டுள்ளது. தனக்கு ஏற்கனவே திருமணமாகி 6 வயதில் குழந்தை இருப்பதை மறைத்த சந்திரசேகர், கடந்த ஆண்டு பவானியை ரகசியமாக திருமணம் செய்துகொண்டார். நாளடைவில் கணவனின் முதல் திருமண ரகசியத்தை அறிந்த பவானி, அதிர்ச்சியடைந்து அவரை விட்டு பிரிந்து வாழ முடிவு செய்ததுடன், இதுகுறித்து தனது பெற்றோரிடமும் தெரிவித்துள்ளார். இதனால் அவரது குடும்பத்தினர் பவானிக்கு வேறு திருமண ஏற்பாடுகளை செய்து வந்துள்ளனர்.

இந்நிலையில், பவானி தன்னை விட்டு பிரிந்துவிடுவார் என்ற அச்சத்தில் சந்திரசேகர் அவரைத் தொடர்ந்து வற்புறுத்தி வந்த நிலையில், அதற்கு பவானி உடன்படவில்லை. இதனால் பவானியைக் கொலை செய்துவிட்டு தானும் தற்கொலை செய்துகொள்ள சந்திரசேகர் திட்டமிட்டுள்ளார். அதன்படி, பவானிக்கு வலுக்கட்டாயமாக விஷம் கொடுத்துள்ளார்; ஆனால் பவானி அதை வாந்தி எடுத்ததால் உயிர் பிழைத்துவிடுவாரோ என்ற பயத்தில், வீட்டில் இருந்த கத்தியால் அவரைச் சரமாரியாகக் குத்திக் கொடூரமாகக் கொலை செய்துள்ளார். பின்னர் தானும் விஷம் குடித்து மயங்கியுள்ளார்.

மகள் இருக்கும் இடத்தைத் தேடிவந்த பவானியின் தந்தை அளித்த புகாரின் பேரில் சம்பவ இடத்திற்கு வந்த போலீசார், உயிரிழந்த பவானியின் உடலை மீட்டதுடன் மயங்கிக் கிடந்த சந்திரசேகரையும் மீட்டு சிகிச்சை அளித்தனர். சிகிச்சைக்குப் பின் குணமடைந்த சந்திரசேகர், போலீசாரிடம் தனது குற்றத்தை ஒப்புக்கொண்டார். இதையடுத்து போலீசார் அவரை முறைப்படி கைது செய்து, நீதிமன்றத்தில் ஆஜர்படுத்தி சிறையில் அடைத்தனர். முதல் திருமணத்தை மறைத்து ஏமாற்றியதுடன், பிரிய முயன்ற இரண்டாவது மனைவியைக் கணவனே திட்டமிட்டுக் கொலை செய்த இச்சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.