பில்லாவுக்குப் பிறகு அஜித் ரீமேக் செய்ய ஆசைப்பட்ட படம்… கடைசிவரை நடக்காமல் போன சோகம்!

தமிழ் சினிமாவில் இன்று வசூல் மன்னன்களாக திகழ்ந்து வரும் நடிகர்களில் ஒருவர் அஜித். தனது ஆரம்ப காலகட்டங்களில் வெற்றிக்காக போராடிக் கொண்டிருந்த போது அவருக்கு வெற்றி படத்தைக் கொடுத்தவர் இயக்குனர் வசந்த். அவர் இயக்கிய ஆசை திரைப்படம்தான் அஜித்தின் முதல் சூப்பர்ஹிட் படமாக அமைந்தது.

அதன் பிறகு காதல் மன்னன், வாலி, அமர்க்களம் மற்றும் முகவரி என அடுத்தடுத்து ஹிட் படங்களாகக் கொடுத்து முன்னணி நடிகராக உயர்ந்தார். ஆனால் அவரை ஒரு ஆக்‌ஷன் ஹீரோவாக்கியது முருகதாஸின் தீனா திரைப்படம்தான். அந்த படம் மிகப்பெரிய வெற்றியைப் பெற்றது. அதன் பின்னர் ஆக்‌ஷன் பாதையில் அஜித் பயணப்பட்டார்.

அதன் பின்னர் அவர் நடித்த அனைத்துப் படங்களும் ஆக்‌ஷன் மசாலாப் படங்கள்தான். இடையில் அவருக்கு சில ஆண்டுகள் சறுக்கல்கள் இருந்தாலும் 2007 ஆம் ஆண்டு வெளியான பில்லா திரைப்படம் அவரை மாஸ் மகாராஜா ஆக்கியது. அதன் பின்னர் அவர் படங்களில் நடிப்பதைக் கணிசமாகக் குறைத்துக்கொண்டு ஆண்டுக்கு ஒரு படம் அல்லது இரண்டு ஆண்டுக்கு ஒரு படம் என்ற விகிதத்தில்தான் நடித்து வருகிறது.

தமிழ் சினிமாவில் உருவாக்கப்பட்ட ஸ்டைலிஷான படங்களில் ஒன்று என பில்லா படம் பற்றி ரசிகர்கள் இப்போதும் வியந்தோதுவார்கள். அந்த படத்தின் வெற்றிக்குப் பிறகு ரஜினிகாந்தின் இன்னொரு சூப்பர்ஹிட் படமான “தீ” படத்தின் ரீமேக்கிலும் அஜித் நடிக்க ஆசைப்பட்டாராம்.

தீ படத்தில் ரஜினி கதாநாயகனாகவும் சுமன் அவரின் தம்பியாகவும் நடித்திருப்பார்கள். ஆனால் அந்த படத்தின் ரீமேக்கில் அண்ணன், தம்பி என இருக் கதாபாத்திரங்களில் தானே நடிக்கலாம் என்றெல்லாம் அஜித் ஆசைப்பட்டுள்ளார். ஆனால் ஏனோ சில காரணங்களால் அந்த படம் மேற்கொண்டு நடக்கவில்லை. அதன் பின்னர் அந்த ரீமேக் கலாச்சாரமும் செயலிழந்து போய்விட்டதால் இனிமேலும் அஜித் அந்த படத்தில் நடிக்க வாய்ப்பில்லை.