அன்னை இல்லம் படிக்கட்டில் நடந்த ‘அந்த’ சம்பவம்… சிவாஜியின் இடது கையில் இப்படி ஒரு மேஜிக் இருக்கா?.. இத்தனை வருடங்களாக யாரும் கவனிக்காத ரகசியம்..!!

நடிகர் திலகம் சிவாஜி கணேசனின் நடிப்பு இலக்கணம் மற்றும் அவரது பிரம்மாண்டமான ‘அன்னை இல்லம்’ குறித்த பல அரிய, வியப்பூட்டும் தகவல்களை எழுத்தாளர் மருதுமோகன் ‘Wow Tamizha’ யூடியூப் சேனல் நேர்காணலில் பகிர்ந்துள்ளார். சிவாஜியின் அன்னை இல்லம் லலித்குமார் அரண்மனை போல, கீழே 16 அறைகளும் மேலே 16 அறைகளும் கொண்டு மொத்தம் 25 கிரவுண்டு பரப்பளவில் அமைந்தது. அன்றைய காலத்தில் மெட்ராஸ் கவர்னராக இருந்த வெங்கடராம ரெட்டி மற்றும் பிரிட்டிஷ் கவர்னர் போக் ஆகியோர் வாழ்ந்த இந்த வீட்டை சிவாஜி இரண்டரை லட்ச ரூபாய்க்கு வாங்கினார். அவரது தம்பி லண்டனிலிருந்து திரும்பியதும், தன் அண்ணன் ராஜகம்பீரமாக வாழ வேண்டும் என்பதற்காக 50 லட்சம் மதிப்புள்ள தேக்கு மரங்களை வாங்கித் தனி படிக்கட்டுகளை அமைத்தார். அந்தப் படிக்கட்டுகளில் சிவாஜி இறங்கி வரும்போதே ஒரு சிறப்பான சத்தம் கேட்கும்.

வீட்டிலிருந்தே தான் நடிக்கும் கதாபாத்திரமாக வாழத் தொடங்கும் சிவாஜி, அன்று என்ன கதாபாத்திரத்தில் நடிக்கப் போகிறாரோ அதற்குரிய நடையிலேயே அந்தத் தேக்கு மரப் படிக்கட்டுகளில் நடந்து வருவார். அவரது தனித்துவமான நடிப்பு இலக்கணத்தின்படி, பிராமணர் கதாபாத்திரத்திற்கு இரண்டு கால்களையும் ஒன்றாக வைத்து நடப்பார்; நிற்கும்போது இடது காலைத் தூக்கி வைத்தால் அது ‘வீரர்’ (வாரியர்) என்றும், வலது காலைத் தூக்கி வைத்தால் அது ‘பணக்காரர்’ அல்லது ‘புலவர்’ என்றும் அர்த்தம். ‘மகாகவி காளிதாஸ்’ படத்தின் புகழ்பெற்ற ‘காலத்தில் அழியாத பாடல்’ காட்சியில் அவரது கால்களைக் கவனித்தால் இந்த நுணுக்கம் புரியும். மேலும், கைகளால் தன் மார்பைத் தொடுவது, தோளைத் தொடுவது என ஒட்டுமொத்த உடல் மொழியின் ஒவ்வொரு அசைவிற்கும் அவர் ஒரு குறிப்பிட்ட அர்த்தம் வைத்திருந்தார்.

அதேபோல, ஒரு படத்தில் கொலைகாரனாக நடிப்பதாக இருந்தால் படம் முழுக்க இடது கையை மட்டுமே பயன்படுத்தும் ரகசிய விதியை சிவாஜி கையாண்டுள்ளார். ‘பாபு’ படத்தில் ஒரு கொலை செய்துவிட்ட பிறகு வரும் ‘இதோ எந்தன் தெய்வம்’ பாடலில் அவர் இடது கையை மட்டுமே நீட்டிப் பாடியதை ரசிகர்கள் யாரும் கவனித்திருக்க வாய்ப்பில்லை. கை, கால்களைப் போலவே கண்களுக்கும் அவர் இலக்கணம் வகுத்திருந்தார்; ‘ராஜபார்ட் ரங்கதுரை’ படத்தில் தன் தங்கையை ஏமாற்றிய மாப்பிள்ளையை அவர் பார்க்கும் பார்வையிலேயே குற்ற உணர்ச்சி தாங்காமல் அந்த நபர் காலில் விழுந்து மன்னிப்புக் கேட்பார். லஞ்சம் வாங்கும் போலீஸா அல்லது நேர்மையான போலீஸா என்பதைக் கூடத் தன் கண்களின் பார்வையாலேயே பிரித்துக் காட்டக்கூடிய அசாத்தியத் திறமை அவரிடம் மட்டுமே இருந்தது.

பிரபல சர்வதேச ஆங்கில நடிகர் ஸ்டானிஸ்லாவ்ஸ்கியின் நடிப்பு விதியின்படி, ஒரு நடிகர் ஒரு சமயத்தில் ஒரு கதாபாத்திரத்தின் ஆன்மாவை மட்டுமே மனதில் ஏற்றி நடிக்க முடியும். ஆனால், உலக நடிப்பு விதிகளையே உடைத்தெறிந்த சிவாஜி கணேசன், 1964 ஆம் ஆண்டில் மட்டும் கர்ணன், புதிய பறவை, பச்சை விளக்கு, கை கொடுத்த தெய்வம் என முற்றிலும் மாறுபட்ட 14 கதாபாத்திரங்களில் நடித்து 14 படங்களை ரிலீஸ் செய்து சாதனை படைத்தார். ஒரே ஆண்டில் பல வித்தியாசமான கதாபாத்திரங்களின் ஆன்மாவைத் தன் வசப்படுத்தி நடித்த சிவாஜியின் இந்த அசாத்திய நடிப்புத் திறனையும், அவரது கம்பீரமான வாழ்க்கை முறையையும் மருதுமோகன் விவரித்துள்ள இந்த நேர்காணல் வீடியோவை சிவாஜி ரசிகர்கள் இணையத்தில் கொண்டாடித் தீர்த்து வருகின்றனர்.