“ரசத்தில் குதிரை முடி.. பீரில் விஷம், நள்ளிரவில் குழி தோண்டிச் செய்வினை”…. மரணத்தின் விளிம்பிலிருந்து மீண்ட பொன்னம்பலம் கண்ணீர்….!

தமிழ் சினிமாவில் முன்னணி வில்லன் நடிகராக வலம் வந்த பொன்னம்பலம், தனது உடல்நிலை பாதிப்புக்கு தனது சொந்த அண்ணனே காரணம் என்று கூறி அதிர்ச்சியூட்டும் தகவல்களை வெளியிட்டுள்ளார். அண்மையில் அளித்த நேர்காணல் ஒன்றில், தன் வளர்ச்சியைப் பொறுக்க முடியாமல் தனது அண்ணன் தன்னைத் தீர்த்துக்கட்டப் பலமுறை முயற்சி செய்ததாக அவர் பகிரங்கமாகக் குற்றம் சாட்டியுள்ளார்.

ஆரம்பத்தில் குடும்ப உறுப்பினர்களிடையே நிலவிய பொறாமையே இந்தப் பிரச்சனைகளுக்கு அடிப்படை என அவர் குறிப்பிட்டுள்ளார். தனது அண்ணனின் திருமண விஷயத்தில் ஏற்பட்ட கருத்து வேறுபாடு பகையாக மாறியதாகவும், அதன் தொடர்ச்சியாகத் தன் அண்ணன் வருமான வரித்துறை சிக்கலில் தன்னை மாட்டிவிட்டதாகவும் பொன்னம்பலம் வேதனையுடன் தெரிவித்துள்ளார்.

மிகவும் அதிர்ச்சியளிக்கும் வகையில், தன்னைத் தற்கொலைக்குத் தூண்டும் விதமாகச் சூனியம் வைத்தது மட்டுமன்றி, உணவிலும் விஷம் கலந்ததாக அவர் கூறியுள்ளார். குறிப்பாக, ரசத்தில் குதிரை முடியைத் தூள் செய்து கலந்து கொடுத்ததாகவும், அதனைச் சாப்பிட்டதால் கடந்த இரண்டு ஆண்டுகளாகத் தொடர்ச்சியான உடல் உபாதைகளுக்கு ஆளானதாகவும் அவர் விவரித்துள்ளார். இந்த பாதிப்பு அவரது குடலைப் பாதித்து, இறுதியில் சிறுநீரகச் செயலிழப்பு வரை கொண்டு சென்றது.

மற்றொரு சம்பவத்தில், ஒருமுறை தனது பிறந்தநாளன்று அண்ணன் வற்புறுத்தி வழங்கிய பீரில் ஏதோ ஒரு விஷத்தைக் கலந்திருந்ததாகவும், அதனைத் தெரியாமல் அருந்திய அவரது நண்பர் உயிரிழந்ததாகவும் பொன்னம்பலம் திடுக்கிடும் தகவலைப் பகிர்ந்துள்ளார். தானும் அந்தப் பானத்தைச் சிறிதளவு குடித்ததால் கடும் பாதிப்புக்கு உள்ளானதாகவும், மருத்துவமனையில் பலமுறை குடலைச் சுத்தப்படுத்த வேண்டியிருந்ததாகவும் அவர் கூறியுள்ளார்.

உடல் வலிமைக்கும் கட்டுக்கோப்பான தோற்றத்திற்கும் பெயர்பெற்ற பொன்னம்பலம், இன்று அடையாளம் தெரியாத அளவுக்கு உருமாறியிருப்பதற்குக் குடும்பப் பகையே காரணம் என்பது திரையுலகினரிடையே சோகத்தை ஏற்படுத்தியுள்ளது. மனைவியுடனான சண்டையில் ஏற்பட்ட ஆத்திரத்தில், தன்னை அண்ணன் கொலை செய்ய முயன்றதை அவரே ஒருமுறை ஒப்புக்கொண்டதாகவும் பொன்னம்பலம் அந்த நேர்காணலில் உருக்கமாகத் தெரிவித்துள்ளார்.