“விஜய்க்கு இது முன்னாடியே தெரியும்”… ஜனநாயகன் விவகாரத்தில் உண்மையை உடைத்த எஸ்.ஏ.சந்திரசேகர்… பகீர் கிளப்பும் தகவல்…!

நடிகர் விஜய்யின் கடைசி படமான ‘ஜனநாயகன்’ இணையதளத்தில் கசிந்த விவகாரம், தமிழ் திரையுலகிலும் அரசியலிலும் பெரும் அதிர்வலைகளை ஏற்படுத்தியுள்ளது. ஹெச்.வினோத் இயக்கத்தில் உருவான இத்திரைப்படம், விஜய்யின் அரசியல் வருகையைத் தொடர்ந்து அவரது திரைப்பயணத்தின் கடைசி படைப்பாக அறிவிக்கப்பட்டிருந்தது. இதனால் ரசிகர்கள் பெரும் எதிர்பார்ப்புடன் பொங்கல் ரிலீஸுக்காக காத்திருந்த நிலையில், தணிக்கை குழுவின் முட்டுக்கட்டை மற்றும் நீதிமன்ற வழக்குகளால் படத்தின் வெளியீடு தொடர்ந்து தள்ளிப்போனது. இந்த சூழலில், தியேட்டருக்கு வரும் முன்பே படம் ஆன்லைனில் வெளியானதால் ஒட்டுமொத்த படக்குழுவும் அதிர்ச்சியில் உறைந்தது.

இந்த லீக் விவகாரத்தின் பின்னணியில் அரசியல் சதி இருப்பதாகத் தமிழக வெற்றிக் கழகத்தினர் (தவெக) பகிரங்கமாகக் குற்றம் சாட்டி வருகின்றனர். விஜய்யின் அரசியல் வளர்ச்சியை முடக்க திமுக மற்றும் பாஜக ஆகிய கட்சிகள் கைகோர்த்து இச்செயலைச் செய்ததாக அவர்கள் கூறுகின்றனர். இருப்பினும், காவல்துறையினர் நடத்திய தீவிர விசாரணையில், ஒரு ஃப்ரீலான்ஸ் எடிட்டர் மற்றும் அவருடன் தொடர்புடைய ஆறு பேர் இந்தப் படத்தை கசியவிட்டதாகக் கண்டறியப்பட்டு கைது செய்யப்பட்டுள்ளனர். ஆனாலும், எடிட்டர் தரப்பிலிருந்து இது நிகழ்ந்திருக்க வாய்ப்பில்லை என பெப்சி உள்ளிட்ட சங்கங்கள் மறுத்து வருவதால் மர்மம் நீடிக்கிறது.

இந்நிலையில், விஜய்யின் தந்தை எஸ்.ஏ.சந்திரசேகர் அளித்துள்ள பேட்டி கூடுதல் கவனத்தைப் பெற்றுள்ளது. ஜனநாயகன் திரைப்படம் லீக்கானது குறித்துப் பேசிய அவர், இந்தப் படத்திற்குத் தணிக்கை மற்றும் வெளியீட்டில் சிக்கல்கள் வரும் என்பது விஜய்க்கு முன்பே தெரியும் என்றும், அதனால்தான் இசை வெளியீட்டு விழாவிலேயே அவர் இதுகுறித்து சூசகமாகப் பேசியிருந்தார் என்றும் குறிப்பிட்டுள்ளார். மேலும், ஒருவரை வீழ்த்துவதற்கு மன ரீதியாகவும் பொருளாதார ரீதியாகவும் தாக்குவது அரசியல் தந்திரம் எனத் தெரிவித்த எஸ்.ஏ.சி, படம் கசிந்ததற்கு எதிர்க்கட்சிகளே காரணமாக இருக்கக்கூடும் என்ற சந்தேகம் தனக்கும் இருப்பதாகத் தெரிவித்துள்ளார்.

தற்போது ‘ஜனநாயகன்’ திரைப்படம் ஆன்லைனில் பரவிவிட்டதால், அதன் வசூல் மற்றும் திரையரங்கு வெளியீடு குறித்த கேள்விக்குறி எழுந்துள்ளது. ஒருபுறம் சட்டப்போராட்டங்கள் மற்றும் தணிக்கை கெடுபிடிகள், மறுபுறம் இணையதள கசிவு எனப் பல்வேறு நெருக்கடிகளுக்கு மத்தியில் விஜய்யின் கடைசிப் படம் சிக்கியுள்ளது. இது தற்செயலாக நடந்த ஒன்றா அல்லது திட்டமிட்ட அரசியல் சதியா என்ற விவாதம் சமூக வலைதளங்களில் அனல் பறக்கத் தொடங்கியுள்ளது, இது விஜய்யின் அரசியல் பயணத்தில் ஒரு முக்கியமான திருப்பமாகப் பார்க்கப்படுகிறது.