தெற்கு ஆசியாவிலேயே முதல்முறை!… வாஷிங்டன் மேயர் தேர்தலில் களமிறங்கும் தேனிப் பெண்… யார் இந்த ரினி சம்பத்?… வியக்க வைக்கும் பின்னணி…!!!

தமிழ்நாட்டின் தேனி மாவட்டத்தில் பிறந்து, அமெரிக்காவின் தலைநகரான வாஷிங்டன் டி.சி.யின் மேயர் பதவிக்குத் திட்டமிட்டுள்ள ரினி சம்பத்தின் அரசியல் பயணம் பெரும் எதிர்பார்ப்பை ஏற்படுத்தியுள்ளது. தனது 7 வயதிலேயே பெற்றோருடன் அமெரிக்காவிற்குக் குடிபெயர்ந்த ரினி, கலிபோர்னியாவில் வளர்ந்து தெற்கு கலிபோர்னியா பல்கலைக்கழகத்தில் (USC) உயர்கல்வி பயின்றார். மாணவர் பருவத்திலேயே தலைமைப் பண்பில் சிறந்து விளங்கிய இவர், 2015-ல் அந்தப் பல்கலைக்கழகத்தின் மாணவர் சங்கத் தலைவராகத் தேர்ந்தெடுக்கப்பட்ட முதல் இந்திய வம்சாவளிப் பெண் என்ற வரலாற்றுச் சிறப்பைப் பெற்றார்.

அரசியல் மற்றும் மேலாண்மைத் துறைகளில் ரினிக்கு அபாரமான அனுபவம் உள்ளது. முன்னாள் அதிபர் பராக் ஒபாமா நிர்வாகத்தில் தேசியக் கல்லூரித் தலைமை கவுன்சிலின் கொள்கை இயக்குநராகப் பணியாற்றிய அனுபவம் கொண்ட இவர், முன்னணி மேலாண்மை மற்றும் தொழில்நுட்ப ஆலோசனை நிறுவனத்தில் மூத்த ஆலோசகராகவும் இருந்துள்ளார். தற்போது வரும் ஜூன் மாதம் நடைபெறவுள்ள ஜனநாயகக் கட்சியின் வேட்பாளர் தேர்விற்கான தேர்தலில் (Primary Election) போட்டியிடத் தயாராக உள்ள ரினி, அதற்குத் தேவையான 4,500 பிரதிநிதிகளின் ஆதரவையும் வெற்றிகரமாகப் பெற்றுள்ளார்.

வாஷிங்டன் டி.சி.யின் அடிப்படைப் பிரச்சினைகளான வீட்டு வசதி, வாடகை உயர்வு, பொருளாதாரச் சமநிலை மற்றும் பொதுப் பாதுகாப்பு ஆகியவற்றை மையமாக வைத்து ரினி தனது பிரசாரத்தை முன்னெடுத்து வருகிறார். “வாஷிங்டன் ஒரு உலகத்தரம் வாய்ந்த தலைநகராக இருந்தாலும், சாமானிய மக்களின் தேவைகள் இன்னும் முழுமையாகப் பூர்த்தி செய்யப்படவில்லை” என்பது இவரது முக்கியக் கருத்தாகும். நகரின் சட்டம் ஒழுங்கைச் சீரமைக்க நவீனத் தொழில்நுட்பங்களைப் பயன்படுத்துவது மற்றும் சிறு வணிகர்களை ஊக்குவிப்பது போன்ற ஆக்கப்பூர்வமான திட்டங்களை இவர் முன்வைக்கிறார்.

வாஷிங்டன் டி.சி.யில் கடந்த 50 ஆண்டுகளாக ஜனநாயகக் கட்சியினரே மேயர் தேர்தலில் வெற்றி பெற்று வரும் சூழலில், அக்கட்சியின் வேட்பாளராக ரினி தேர்வானால் நவம்பர் தேர்தலில் அவர் வெற்றி பெற அதிக வாய்ப்புள்ளதாக அரசியல் வல்லுநர்கள் கருதுகின்றனர். கமலா ஹாரிஸ், பிரமீளா ஜெயபால் போன்ற இந்திய வம்சாவளிப் பெண்கள் அமெரிக்க அரசியலில் முத்திரை பதித்துள்ள நிலையில், தேனியைச் சேர்ந்த ஒரு பெண் அமெரிக்கத் தலைநகரின் மேயர் நாற்காலியில் அமர்வது தமிழகத்திற்குப் பெரும் பெருமை சேர்க்கும் விஷயமாகும். ரினியின் இந்த முயற்சி அடுத்த தலைமுறை தமிழ் இளைஞர்களுக்கு ஒரு சிறந்த ஊக்கமாக அமையும் என்பதில் ஐயமில்லை.