“நன்றாக ஓடிய ஏசி.. வந்த மெக்கானிக் செய்த அந்த காரியம்.. டெல்லி பெண்ணுக்கு நடந்த ‘பகீர்’ சம்பவம்… இணையத்தில் வைரலாகும் பதிவு!

இன்றைய காலகட்டத்தில் வீடுகளில் குளிரூட்டிகள் அத்தியாவசியமான ஒன்றாக மாறிவிட்ட நிலையில், அதற்கான பழுதுபார்ப்பு சேவைகளும் அதிகரித்துள்ளன. உள்ளூர் மெக்கானிக்குகள் மட்டுமன்றி, ஆன்லைன் செயலிகள் மூலமும் இச்சேவைகள் எளிதாகப் பெறப்படுகின்றன. இருப்பினும், இத்தகைய செயலிகள் எப்போதும் பாதுகாப்பான சேவையை வழங்குவதில்லை என்பதற்கு டெல்லியைச் சேர்ந்த வெரோனிகா என்ற பெண்ணுக்கு ஏற்பட்ட கசப்பான அனுபவமே சான்றாகும். தனது வீட்டில் நன்றாக இயங்கிக் கொண்டிருந்த ஏசியை சர்வீஸ் செய்வதற்காக, அவர் ‘அர்பன் கம்பெனி’ செயலியில் முன்பதிவு செய்திருந்தார். ஆனால், வீட்டிற்கு வந்த தொழில்நுட்ப வல்லுநர் ஏசியில் கேஸ் இல்லை என்று கூறியதுடன், சர்வீஸ் முடிந்த பிறகு நிறுவனத்தின் செயலியில் அந்தப் பதிவை ரத்து செய்துவிட்டு, நேரடியாக 500 ரூபாய் பணத்தைப் பெற்றுக்கொண்டு சென்றுள்ளார். வெரோனிகா தனது சிறு குழந்தையுடன் தனியாக இருந்ததால் அச்சத்தின் காரணமாக அந்தப் பணத்தைச் செலுத்தியுள்ளார்.

Booked an AC service through Urban Company.

AC was working fine. Compressor was starting normally.

Technicians arrived and immediately claimed there was “no gas”. I told them it was working completely fine. I refused any gas refill and asked them to perform only the service.…— Vironika (@vironikaom) June 18, 2026

தொழில்நுட்ப வல்லுநர் சென்ற சில நிமிடங்களிலேயே ஏசியின் கம்ப்ரசர் முற்றிலும் வேலை செய்வதை நிறுத்தியது. செயலியில் சேவை ரத்து செய்யப்பட்டிருந்ததால், உடனடியாகப் புகாரளிப்பதிலும் சிக்கல் ஏற்பட்டது. இதுகுறித்து வெரோனிகா தனது வேதனையான அனுபவத்தை ட்விட்டரில் பகிர்ந்ததைத் தொடர்ந்து, அர்பன் கம்பெனி நிறுவனம் அதற்கு அதிகாரப்பூர்வமாகப் பதிலளித்துள்ளது. தங்களுக்கு ஏற்பட்ட இந்த விரும்பத்தகாத அனுபவத்திற்கு மன்னிப்புக் கோரியுள்ள அந்நிறுவனம், தொழில்நுட்ப வல்லுநரின் தவறான நடத்தை மற்றும் ஏசி பழுதடைந்தது குறித்து உடனடியாக விசாரிப்பதாக உறுதியளித்துள்ளது. மேலும், பாதிக்கப்பட்ட பெண்ணின் தொடர்பு எண் மற்றும் பணம் செலுத்தியதற்கான ஆதாரங்களைப் பெற்றுக்கொண்டு, முன்னுரிமை அடிப்படையில் அடுத்த நாள் மற்றொரு தொழில்நுட்ப வல்லுநரை அனுப்பி இப்பிரச்சனைக்குத் தீர்வு காண்பதாகத் தெரிவித்துள்ளது.