அடேங்கப்பா..! “ஒரு டோல் கூட தாண்டல”… 550 கிலோ வெள்ளி கொள்ளை… 2,400 கி.மீ சுற்றி போலீசுக்கு தண்ணி காட்டிய மாஸ்டர்மைண்ட்…!!

சேலம் பள்ளப்பட்டி சின்னேரி வயக்காடு பகுதியைச் சேர்ந்த வெள்ளி வியாபாரி பாலசுப்பிரமணி என்பவரது பட்டறையில், கடந்த சில நாட்களுக்கு முன்பு நள்ளிரவில் புகுந்த முகமூடி கும்பல் ஒன்று காவலாளியைத் தாக்கி கட்டிப்போட்டுவிட்டு சுமார் 550 கிலோ வெள்ளிப் பொருட்களைக் கொள்ளையடித்துச் சென்றது. இச்சம்பவம் தொடர்பாக சேலம் மாநகர காவல் ஆணையர் மேற்பார்வையில் 4 தனிப்படைகள் அமைக்கப்பட்டு குற்றவாளிகளைப் பிடிக்கத் தீவிர தேடுதல் வேட்டை தொடங்கப்பட்டது.

வழக்கின் தீவிர விசாரணையில், கொள்ளைக் கும்பலின் முக்கிய சூத்திரதாரியான கோவையைச் சேர்ந்த அபிஷேக் என்பவரைத் தஞ்சாவூர் பேருந்து நிலையம் அருகே தனிப்படை போலீஸார் கைது செய்தனர். அவரிடம் நடத்தப்பட்ட தீவிர விசாரணையைத் தொடர்ந்து, அவரது கூட்டாளிகளான ஸ்ரீதர், ஞானபிரகாசம், அருண்குமார் மற்றும் அண்ணாமலை ஆகிய நால்வரும் கைது செய்யப்பட்டனர். இவர்களிடமிருந்து 323 கிலோ வெள்ளி நகைகள், கொள்ளைக்குப் பயன்படுத்திய 2 கார்கள், முகமூடிகள் மற்றும் இரும்புக் கம்பிகள் ஆகியவை பறிமுதல் செய்யப்பட்டுள்ளன.

கொள்ளைச் சம்பவத்தின் போது சிசிடிவி கேமராக்கள் மற்றும் ஹார்ட் டிஸ்க்குகளை சேதப்படுத்திய இக்கும்பல், காவல்துறையிடம் இருக்க சுங்கச்சாவடிகளைத் தவிர்த்து சுமார் 2,400 கி.மீ தூரம் வரை கிராமப்புற மற்றும் மாற்றுச் சாலைகள் வழியாகப் பயணித்துள்ளனர். எனினும், ஒரு குறிப்பிட்ட இடத்தில் அவர்களது வாகனம் நீண்ட நேரம் நின்றிருந்ததை முக்கியத் தடயமாகக் கொண்டு, கோவை மற்றும் மதுரை வழித்தடங்களில் உள்ள ஆயிரத்துக்கும் மேற்பட்ட சிசிடிவி காட்சிகளை ஆய்வு செய்து தொழில்நுட்ப உதவியுடன் போலீஸார் இவர்களைக் கைது செய்தனர். மேலும், தலைமறைவாக உள்ள எஞ்சிய 3 பேரையும் தனிப்படையினர் தொடர்ந்து தேடி வருகின்றனர்.