காப்பாத்துங்க.. காப்பாத்துங்க!.. அதிகாலை 3 மணிக்கு கதறல் சத்தம்.. தூங்கிக் கொண்டிருந்த 2 பெண்கள் மீது பெட்ரோல் ஊற்றிய 60 வயது முதியவர்.. நெஞ்சை பதறவைக்கும் பின்னணி…!!!

விருதுநகர் மாவட்டம் அருப்புக்கோட்டை அருகே உள்ள பாளையம்பட்டி அருந்ததியர் தெருவைச் சேர்ந்தவர் சாந்தி (40). கணவரை இழந்த இவர், கோபாலபுரத்தில் துப்புரவுப் பணியாளராக வேலை செய்து வந்தார். சம்பவத்தன்று இரவு சாந்தி, அவரது உறவினர் ஸ்ரீதேவி (45), மற்றும் சாந்தியின் மகன், மகள் ஆகியோர் வீட்டில் தூங்கிக் கொண்டிருந்தனர். கோடைகாலம் என்பதால் சாந்தியும் ஸ்ரீதேவியும் வீட்டின் கதவைச் சிறிது திறந்து வைத்துவிட்டு, வாசலுக்கு அருகே படுத்துத் தூங்கியதாகத் தெரிகிறது.

அதிகாலை 3 மணி அளவில் இருவரும் அயர்ந்து தூங்கிக் கொண்டிருந்தபோது, அங்கு வந்த மர்ம நபர் ஒருவர் அவர்கள் மீது திடீரென பெட்ரோலை ஊற்றியுள்ளார். அவர்கள் சுதாரித்து எழுவதற்குள் அந்த நபர் தீயை பற்றவைத்துவிட்டு அங்கிருந்து தப்பியோடினார். சாந்தி மற்றும் ஸ்ரீதேவி ஆகிய இருவரின் உடலிலும் தீப்பிடித்து மளமளவெனப் பரவியது. இவர்களின் அலறல் சத்தம் கேட்டு ஓடிவந்த சாந்தியின் மகன் சந்தீப்குமார் (16), தீயை அணைத்து இருவரையும் காப்பாற்றி வெளியே கொண்டு வந்தான். பலத்த தீக்காயமடைந்த இருவரும் உடனடியாக அருப்புக்கோட்டை மற்றும் விருதுநகர் அரசு மருத்துவமனைகளில் தீவிர சிகிச்சைக்காக அனுமதிக்கப்பட்டனர்.

இக்கொடூர சம்பவம் குறித்து தகவல் அறிந்த மாவட்ட போலீஸ் சூப்பிரண்டு ஸ்ரீ நாதா மற்றும் கூடுதல் போலீஸ் சூப்பிரண்டு கருப்பையா ஆகியோர் சம்பவ இடத்தைப் பார்வையிட்டு விசாரணை நடத்தினர். கைரேகை நிபுணர்கள் மூலம் தடயங்கள் சேகரிக்கப்பட்ட நிலையில், போலீசாரின் முதற்கட்ட விசாரணையில் காரியாபட்டி அருகே உள்ள கல்குறிச்சியைச் சேர்ந்த முத்து (60) என்பவர்தான் பெண்கள் மீது பெட்ரோல் ஊற்றி தீ வைத்தது என்பது தெரியவந்தது. இதையடுத்து, தனிப்படை போலீசார் முத்துவைக் கைது செய்து, இச்சம்பவம் முன்விரோதம் காரணமாக நடந்ததா அல்லது வேறு ஏதேனும் காரணமா என்பது குறித்து தீவிர விசாரணை நடத்தி வருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.