தோட்டத்தில் வைத்தியம்… விரட்டி விரட்டி மாமூல் கேட்ட போலீஸ்… வீடியோவால் வெடித்த சர்ச்சை… டி.ஐ.ஜி மணிவண்ணன் எடுத்த அதிரடி முடிவு…!!

சிவகங்கை மாவட்டம் சிங்கம்புணரி பகுதியில் பாரம்பரிய முறையில் வைத்தியம் பார்த்து வந்த நெடுஞ்செழியன் என்பவர், தன்னிடம் காவல்துறையினர் லஞ்சம் கேட்பதாக சமூக வலைதளங்களில் சமீபத்தில் பரபரப்பான வீடியோ ஒன்றை வெளியிட்டார். முறையான மருத்துவச் சான்றிதழ் இல்லாததால் முன்னதாக கைது செய்யப்பட்டு ஜாமீனில் வெளிவந்த இவர், தற்போது தனது தோப்பில் கோவில் கட்டி தொடர்ந்து சிகிச்சையளித்து வருகிறார். இந்நிலையில், காவல் ஆய்வாளர் சீனிபாபு தன்னிடம் மாதாந்திர மாமூல் கேட்டு மிரட்டுவதாகவும், தர மறுத்தால் பொய் வழக்கு பதிவு செய்துவிடுவேன் என அச்சுறுத்துவதாகவும் அந்த வீடியோவில் அவர் பகிரங்கமாக குற்றம் சாட்டியிருந்தார்.

அத்துடன், கடந்த சில மாதங்களுக்கு முன்பு காவலர் ஜெயராஜ் என்பவர் தன்னிடம் பணம் வாங்கும் வீடியோ ஆதாரத்தையும் நெடுஞ்செழியன் அந்தப் பதிவில் இணைத்திருந்தார். இந்த குற்றச்சாட்டுகள் மற்றும் வீடியோ ஆதாரங்கள் குறித்து காவல்துறை உயரதிகாரிகள் தீவிர விசாரணை மேற்கொண்டனர். அதன் அடிப்படையில், நாட்டு வைத்தியரிடம் பணம் கேட்டு மிரட்டிய காவல் ஆய்வாளர் சீனிபாபு மற்றும் லஞ்சம் பெற்ற காவலர் ஜெயராஜ் ஆகிய இருவரையும் பணியிடை நீக்கம் செய்து டி.ஐ.ஜி. மணிவண்ணன் அதிரடியாக உத்தரவிட்டுள்ளார்.