“தங்கையை கொன்றவனை சும்மா விடமாட்டேன்”… ஆட்டோ ஸ்டாண்டில் பட்டப்பகலில் நடந்த கொடூரம்… பழிக்குப்பழி வாங்கிய தந்தை-மகன்….!

தூத்துக்குடி மாவட்டம் உடன்குடி அருகே உள்ள சாதரக்கோன்விளையைச் சேர்ந்தவர் சிவன். இவரது மகள் முத்துலட்சுமிக்கும், நாங்குநேரியைச் சேர்ந்த வேல்முத்து என்பவருக்கும் கடந்த 2024-ம் ஆண்டு திருமணம் நடைபெற்றது. திருமணத்திற்குப் பிறகு தனது கணவர் வீட்டில் வசித்து வந்த முத்துலட்சுமி, தலை தீபாவளியைக் கொண்டாடுவதற்காகத் தனது தந்தை வீட்டிற்கு வந்திருந்தார். அப்போது அந்தத் தெரு வழியாகச் சென்ற ஒரு வாகன ஓட்டியை அதிவேகமாகச் சென்றதற்காகச் சிவனும் அவரது மகன் கோவிந்தனும் கண்டித்துள்ளனர். இதில் ஏற்பட்ட வாக்குவாதத்தில், அதே பகுதியைச் சேர்ந்த பெருமாள் என்பவர் வாகன ஓட்டிக்கு ஆதரவாகச் செயல்பட்டதால் இரு தரப்பினருக்கும் இடையே மோதல் வெடித்தது.

இந்த மோதலின் உச்சகட்டமாக, பெருமாளின் மகன்கள் மணிகண்டன் மற்றும் சுப்பையாதாஸ் ஆகியோர் சிவனிடம் தகராறில் ஈடுபட்டனர். அப்போது அங்கு வந்த சிவனின் மகள் முத்துலட்சுமியை, “எங்கள் அண்ணனையே எதிர்த்துப் பேசுகிறீர்களா?” எனக் கேட்டு சுப்பையாதாஸ் கத்தியால் சரமாரியாகக் குத்தினார். இதில் பலத்த காயமடைந்த முத்துலட்சுமி பரிதாபமாக உயிரிழந்தார். இச்சம்பவம் தொடர்பாகப் போலீசார் சுப்பையாதாஸைக் கைது செய்து சிறையில் அடைத்தனர். இந்தத் துயரச் சம்பவத்தைத் தொடர்ந்து, பெருமாளின் குடும்பத்தினர் அந்த ஊரை விட்டு வெளியேறி வேறு கிராமத்தில் வசித்து வந்தனர்.

இருப்பினும், பெருமாளின் மற்றொரு மகனான வேல்முருகன் மட்டும் உடன்குடி பகுதியில் ஆட்டோ ஓட்டித் தனது வாழ்வாதாரத்தைத் தொடர்ந்து வந்துள்ளார். தனது கண் முன்னே தங்கை முத்துலட்சுமி கொல்லப்பட்டதை ஜீரணிக்க முடியாமல் இருந்த கோவிந்தன், எப்படியாவது அதற்குப் பழிவாங்க வேண்டும் என்று தகுந்த நேரத்திற்காகக் காத்திருந்தார். இந்நிலையில், இன்று காலை ஆட்டோ ஸ்டாண்டில் வேல்முருகன் தனியாக இருந்ததைக் கண்ட கோவிந்தன் மற்றும் அவரது கூட்டாளிகள், மறைத்து வைத்திருந்த அரிவாளால் வேல்முருகனைச் சரமாரியாக வெட்டிச் சாய்த்தனர். இதில் ரத்த வெள்ளத்தில் துடித்த வேல்முருகன் சம்பவ இடத்திலேயே துடிதுடித்து உயிரிழந்தார்.

தகவலறிந்து சம்பவ இடத்திற்கு விரைந்த குலசேகரன்பட்டினம் போலீசார், வேல்முருகனின் உடலைக் கைப்பற்றிப் பிரேதப் பரிசோதனைக்காகத் தூத்துக்குடி அரசு மருத்துவமனைக்கு அனுப்பி வைத்தனர். இச்சம்பவம் தொடர்பாக வழக்குப்பதிவு செய்த போலீசார், தலைமறைவாக இருந்த கோவிந்தன் மற்றும் அவருக்கு உதவியாக இருந்த இரண்டு சிறுவர்களை அதிரடியாகக் கைது செய்தனர். தலை தீபாவளி கொண்டாட வந்த பெண் கொல்லப்பட்டதற்குப் பழிக்குப் பழியாக, பட்டப்பகலில் ஆட்டோ ஓட்டுநர் வெட்டிக்கொலை செய்யப்பட்ட இச்சம்பவம் உடன்குடி பகுதியில் பெரும் பதற்றத்தையும் பரபரப்பையும் ஏற்படுத்தியுள்ளது.