கர்நாடக மாநிலம் விஜயாப்புராவைச் சேர்ந்த ஈரண்ணா படிகர் என்ற நபர், இன்ஸ்டாகிராம் வலைத்தளத்தில் தன்னை ஒரு இஸ்ரோ ஊழியராகச் சித்தரித்து போலி கணக்கு ஒன்றைத் தொடங்கியுள்ளார். விண்வெளி ஆராய்ச்சி மையத்தில் வேலை வாங்கித் தருவதாக ஆசை வார்த்தை கூறி, பல்வேறு மாவட்டங்களைச் சேர்ந்த வேலை தேடும் இளைஞர்களிடம் இருந்து பல லட்சம் ரூபாயை இணையவழியாகப் பெற்று மோசடி செய்துள்ளார். மேலும், சுமார் முப்பதுக்கும் மேற்பட்ட இளம் பெண்களை இதே வாக்குறுதியைக் கூறி ஏமாற்றியது மட்டுமின்றி, அவர்களைத் தன் ஆசைக்கு இணங்க வைத்து பாலியல் ரீதியாகவும் சுரண்டலுக்கு ஆளாக்கியுள்ளார்.
பல மாதங்களாகியும் வேலை கிடைக்காததால் சந்தேகம் அடைந்தவர்கள் பணத்தைத் திருப்பித் தருமாறு வற்புறுத்தியபோது, அவர் தனது சமூக வலைத்தளக் கணக்கை நீக்கிவிட்டுத் தலைமறைவாகியுள்ளார். இதையடுத்து பாதிக்கப்பட்டவர்கள் அளித்த புகாரின் பேரில், வழக்குப் பதிவு செய்த கதக் காவல்துறையினர் அவரைப் பிடித்து தீவிர விசாரணை மேற்கொண்டனர். தான் வாங்கிய தனிப்பட்ட கடன்களை அடைப்பதற்காகவே இந்த நூதன மோசடியில் அவர் ஈடுபட்டது விசாரணையில் அம்பலமானது. மேலும், அவரது அலைபேசியில் பல பெண்களின் அந்தரங்கப் புகைப்படங்கள் இருந்ததையும், அவரது வீட்டில் ஏராளமான ஆணுறைகள் இருந்ததையும் கண்டறிந்து பறிமுதல் செய்த போலீசார், இந்த விவகாரம் குறித்து தொடர்ந்து விசாரணை நடத்தி வருகின்றனர்.