திருநெல்வேலி மாவட்டம் ராதாபுரம் காவல் நிலைய எல்லைக்குட்பட்ட பகுதியில், கடந்த ஆகஸ்ட் 25-ஆம் தேதி அதிகாலையில் ஒன்பது வயது சிறுமியின் வீட்டிற்குள் நுழைந்த மர்ம நபர் ஒருவர் அவருக்கு பாலியல் தொல்லை கொடுத்துள்ளார். இது தொடர்பாக சிறுமியின் தாயார் அளித்த புகாரின் அடிப்படையில் வள்ளியூர் அனைத்து மகளிர் காவல் துறையினர் வழக்குப்பதிவு செய்தனர். ஆரம்பத்தில் குற்றவாளி யார் எனத் தெரியாத நிலையில், டி.எஸ்.பி வெங்கடேஷ் தலைமையிலான பல்வேறு காவல் நிலைய அதிகாரிகளை உள்ளடக்கிய குழுவினர், அப்பகுதியில் பொருத்தப்பட்டிருந்த சி.சி.டி.வி கண்காணிப்பு கேமராக்களின் பதிவுகளைக் கொண்டு தீவிர விசாரணையை முன்னெடுத்தனர்.
கண்காணிப்பு கேமராக்களில் பதிவான காட்சிகளைத் தொடர்ந்து ஆய்வு செய்ததில், வீட்டின் பின்புறமாக தப்பிச் சென்ற நபர் அடையாளம் காணப்பட்டார். இதன்படி, மேற்கு வங்க மாநிலம் கூச் பெஹார் மாவட்டத்தைச் சேர்ந்த சூரஜ்தேவ்ராய் என்பவர்தான் இந்த குற்றச் செயலில் ஈடுபட்டார் என்பதை உறுதி செய்த போலீசார், அவரைக் கைது செய்து நீதிமன்றக் காவலில் சிறையில் அடைத்தனர். தொழில்நுட்பக் கோணத்தில் துரிதமாகச் செயல்பட்டு குற்றவாளியை விரைவாகக் கைது செய்த டி.எஸ்.பி உள்ளிட்ட காவல் துறை அதிகாரிகளை, திருநெல்வேலி மாவட்ட காவல் கண்காணிப்பாளர் விஸ்வேஸ் பாலசுப்பிரமணியம் சாஸ்திரி வெகுவாகப் பாராட்டினார்.